މި މަހު އެމެޒޯން ޕްރައިމް ވީޑިއޯ އިން ޕްރީމިއާ ކުރަން ހަމަޖެހިފައިވާ ޑޮކިއުމަންޓަރީ ސީރީޒް "އެންގްރީ ޔަންގް މެން: ދަ ސަލީމް-ޖާވިދު ސްޓޯރީ" ގެ ޓްރެއިލާ މިއަދު ދައްކާލައިފި އެވެ.
ޓްރެއިލާ ލޯންޗްކުރަން މުމްބާއީގައި މިއަދު ހާއްސަ ހަފުލާއެއް ވެސް ބޭއްވި އެވެ. އެ ހަފުލާގައި ސަލީމްގެ ދަރިންގެ ތެރެއިން މަޝްހޫރު އެކްޓަރު ސަލްމާން ޚާނާއި ޖާވިދު އަޚްތަރުގެ ދަރިން އަދި ޑައިރެކްޓަރުން ކަމަށްވާ ފަރުހާން އަޚްތަރާއި ޒޯޔާ އަޚްޔަރު ވެސް ބައިވެރިވި އެވެ.
ހަތްދިހަ އާއި އަށްޑިހައިގެ އަހަރުތަކުގައި ހިންދީ ސިނަމާގެ ކާމިޔާބު އެތައް ފިލްމެއްގެ ސްކްރީންޕްލޭ އެކީގައި ލިޔުނު ކުރީގެ ހުނަރުވެރި ދެ ސްކްރީން ރައިޓަރުން ކަމަށްވާ ސަލީމް-ޖާވިދަށް ބިނާކޮށް ގެނެސްދޭ ޑޮކިއުމަންޓަރީ، "އެންގްރީ ޔަންގް މެން" އަކީ ސަލްމާންގެ ފިލްމު ކުންފުނި، އެސްކޭއެފާއި ފަރުހާން ގެ އެކްސެލް އެންޓަޓަައިންމަންޓާއި ޒޯޔާ އަޚްތަރުގެ ޓައިގާ ބޭބީ ފިލްމްސް ގުޅިގެން ހަދާފައިވާ އެއްޗެކެވެ.
މި މަހުގެ 20 ގައި ޕްރީމިއާކުރަން ހަމަޖެހިފައިވާ މި ޑޮކިއު-ސީރީޒް ޑައިރެކްޓްކުރީ މަޝްހޫރު ފިލްމު އެޑިޓަ ނަމްރަތާ ރާއޯ އެވެ. މިހާތަނަށް އެތައް ފިލްމެއް އެޑިޓްކުރި ނަމްރަތާ އަކީ އެ ދާއިރާ އިން ނެޝަނަލް އެވޯޑް ވެސް ހޯދާފައިވާ ފަންނާނެކެވެ.
ސަލީމް-ޖާވިދުގެ ޑޮކިއުމަންޓަރީ އަށް "އެންގްރީ ޔަންގް މެން" ގެ ނަން ދީފައި ވަނީ އެ މީހުން ލިޔުނު ފިލްމުތަކުގައި އެފަދަ ކެރެކްޓާތައް ކުޅެގެން އަމީތާބް ބައްޗަން "އެންގްރީ ޔަންގް މޭން" ގެ ގޮތުގައި މަޝްހޫރުވެފައިވާތީ އެވެ. އޭނަ އަކީ ސަލީމް-ޖާވިދު ލިޔުނު ގިނަ ފިލްމުތަކެއް ކުޅުނު އަދި އެންމެ ކާމިޔާބު ފިލްމުތަކުގެ އެކްޓަރެވެ. އޭގެ ތެރޭގައި "ކާލާ ޕައްތަރު"، "ދީވާރު". "ޝޯލޭ"، "ޑޮން"، "ޒަންޖީރު"، "ޓްރިޝުލް" އަދި "ދޯސްތާނާ" ހިމެނެ އެވެ.
"އެންގްރީ ޔަންގް މެން" ގައި ސަލީމް-ޖާވިދުގެ ކެރިއަރުގެ އެންމެ އުސްއަލިތަކާއި އެ މީހުންގެ މިހާރުގެ ވާހަކަތަކުގެ އިތުރުން އެކި މީހުން އެ މީހުންނާ ބެހޭ ގޮތުން ދައްކާފައިވާ ވާހަކަތައް ވެސް ހިމެނޭނެ އެވެ.
މިއަދުގެ ހަފުލާގައި ސަލީމު-ޖާވިދު ވަނީ ދެ މީހުން އަނެއްކާ ވެސް އަލުން އެކީގައި ސްކްރީންޕްލޭތައް ލިޔަން ފަށަން ނިންމާފައިވާކަން ވެސް އިއުލާންކޮށްފަ އެވެ. ޖާވިދަކީ މިހާރު އިންޑިއާގެ އެންމެ ނުޒޫފު ގަދަ އެއް ޅެންވެރިންގެ ތެރެއިން އެކެކެވެ. މިހާތަނަށް އެތައް ފިލްމެއްގެ ލަވަތައް އޭނަ ހަދާފައިވެ އެވެ.