ބިދޭސީ މަސައްކަތްތެރިންނަށް ދޫކޮަށްފައިވާ ހުއްދަތަކާ ގުޅިގެން، ދައުލަތަށް ދައްކަން ޖެހޭ ވޯކް ޕާމިޓާއި ކޯޓާ ފީ ނުދައްކައި ޖޫރިމަނާ އަރާފައިވާ ފަރާތްތަކުގެ މައުލޫމާތު އާންމު ކުރިތާ ތިން ހަފުތާ ވީއިރު 182 މިލިއަން ރުފިޔާ ރިކަވާ ކުރެވިފައިވާ ކަމަށް ހޯމް މިނިސްޓްރީން ބުނެފި އެވެ.
ބިދޭސީ މަސައްކަތްތެރިންނަށް ދޫކޮަށްފައިވާ ހުއްދަތަކާ ގުޅިގެން، ވަޒީފާދޭ ފަރާތުން ދައުލަތަށް ދައްކަން ޖެހި ނުދައްކާ ހުރި ފީތަކާއި ޖޫރިމަނާތަކުގެ އަދަދު 100،000 ރުފިޔާ އަށްވުރެ އިތުރުވާ ކުންފުނިތަކުގެ ލިސްޓެއް ހޯމް މިނިސްޓްރީން ނެރުނީ މިދިޔަ ޖުލައި މަހުގެ 24 ވަނަ ދުވަހު އެވެ.
މިނިސްޓްރީން ނެރުނު ލިސްޓުގައި 1026 ކުންފުންޏެއްގެ މަޢުލޫމާތު ވަނީ އާންމުކޮށްފަ އެވެ. މި ލިސްޓުގައި ފުޅާ ދާއިރާއެއްގައި ވިޔަފާރި ކުރާ ބޮޑެތި ކުންފުނިތައް ހިމެނެ އެވެ.
ހޯމް މިނިސްޓްރީން ރޭ ބުނީ އެ ލިސްޓު އާންމުކުރިތާ ތިން ހަފްތާތެރޭ 182،954،572 މިލިއަން ރުފިޔާ ރިކަވާ ކޮށްފައިވާ ކަމަށެވެ. އެކަމަކު އޭގެ އިތުރު ތަފުސީލެއް ދީފައެއް ނުވެ އެވެ.
މިނިސްޓްރީޏް ނެރުނު ލިސްޓުގައިވާ ގޮތުން ޖޫރިމަނާގެ ގޮތުގައި އެންމެ ބޮޑު އެއްޗެއް ދައްކަންޖެހޭ ފަރާތުގެ ޖޫރިމަނާ ވެސް 26.8 މިލިއަން ރުފިޔާ އަށް ވުރެ މައްޗަށް އަރަ އެވެ. މީގެ ތެރޭގައި ވޯކް ޕާމިޓް ފީގެ ގޮތުގައި ދައްކަންޖެހޭ 24 މިލިއަނަށް ވުރެ ގިނަ ރުފިޔާއާއި، ކޯޓާ ފީގެ ގޮތުގައި ދައްކަންޖެހޭ 2 މިލިޔަނަށް ވުރެ ގިނަ ރުފިޔާ ހިމެނެ އެވެ.
މި ސަރުކާރުން ވެރިކަމާ ހަވާލުވުމަށް ފަހު، ރާއްޖޭގައި ގަވާއިދާ ހިލާފަށް އުޅޭ ބިދޭސީންގެ މައްސަލައަށް ދާއިމީ ހައްލެއް ގެނައުމަށްޓަކައި ދަނީ ހާއްސަ މަސައްކަތްތަކެއް ކުރަމުންނެވެ.
އިމިގްރޭޝަނުން ހާމަކުރާ ގޮތުގައި މިދިޔަ މަހުގެ 15 ވަނަ ދުވަހުގެ ނިޔަލަށް ގަވާއިދާ ޚިލާފަށް ރާއްޖޭގައި އުޅެމުންދިޔަ 2069 ބިދޭސީން ވަނީ ފުރުވާލާފަ އެވެ. މި އަދަދަކީ މިދިޔަ އަހަރުގެ ނޮވެންބަރު 16 އާއި ހަމައަށް ބަލާއިރު އިތުރު އަދަދެއް ކަމަށް އިމިގްރޭޝަނުން މައުލޫމާތުދެ އެވެ.