އިޒްރޭލުން ދިން ހަމަލާއެއްގައި ފަލަސްތީނުގެ ގާޒާ އަށް އަލަށް އުފަންވި އެއްމާބަނޑު ދެ ކުދިން ޝަހީދުކޮށްލައިފި އެވެ.
މި ދެ ކުދިން އުފަންވެފައިވަނީ މިދިޔަ ހޮނިހިރު ދުވަހު ކަމަށްވާއިރު، އެ ކުދިން ޝަހީދުވެފައިވަނީ އިޒްރޭލުން އިއްޔެ އެ ކުދިންގެ އާއިލާ ދިރިއުޅެމުންދިޔަ ގެއަށް ދިން ވައިގެ ހަމަލާއެއްގަ އެވެ. އެ ހަމަލާގައި އެ ކުދިންގެ މަންމަ ވެސް ވަނީ ޝަހީދުވެފަ އެވެ.
މި ހަމަލާދީ އެ ކުދިންނާއި އެ ކުދިންގެ މަންމަ ޝަހީދުކޮށްލިއިރު، އެ ކުދިންގެ ބައްޕަ އެ ވަގުތު ހުރީ އެ ކުދިންގެ އުފަން ދުވަހުގެ ސެޓްފިކެޓް ބަލާ ލޯކަލް ގަވަމެންޓް އޮފީހަށް ގޮހެވެ.
އެއްމާބަނޑު ދެ ކުދިންގެ ބައްޕަ، މުހައްމަދު އަބޫ އަލް ގުމްސަން ބުނީ ގެއަށް ހަމަލާދިން ހަބަރު އޭނާ އަށް ދިނީ ގެކައިރީ އަވަށްޓެރިން ފޯނުން ގުޅާފައި ކަމަށާއި އެ ދެ ކުދިންނަކީ އޭނާއަށް ލިބުނު ބޮޑު އުފަލެއް ނަމަވެސް އެ އުފާވެރިކަން މިހާރު އެއްކޮށް ގޮސްފައިވާ ކަމަށެވެ. އެ ދެ ކުދިން ޝަހީދުވެފައިވާއިރު، އެ ކުދިން ދުނިޔެ އަށް އުފަންވުމުގެ އުފާވެސް ރަނގަޅަށް ފާހަގަކޮށްލަން ފުރުސަތެއް ނުލިބުނު ކަމަށް މުހައްމަދު ބުންޏެވެ.
މި ހަމަލާއާ ގުޅޭގޮތުން އިޒްރޭލު ސިފައިން ވަކި އެއްޗެއް ބުނެފައިނުވާއިރު، ގަތުލްއާންމު ފެށުނު ފަހުން މިހާތަނަށް އިޒްރޭލުން ދިން ހަމަލާތަކުގައި ގާޒާ އަށް އުފަންވި 115 ކުދިން ޝަހީދުވެފައިވާ ކަމަށް ގާޒާގެ ހެލްތު މިނިސްޓްރީން ބުނެ އެވެ.
މިދިޔަ އޮކްޓޫބަރު މަހުގެ 7 ވަނަ ދުވަހުން ފެށިގެން އިޒްރޭލުން ދެމުންދާ ހަމަލާތަކުގައި ގާޒާ އިން ޝަހީދުވި މީހުންގެ އަދަދު ވަނީ 39،000 އަށް ވުރެ މައްޗަށް އަރާފަ އެވެ.