އެމެރިކާގެ މަޝްހޫރު ކޮފީ ޗެއިން، ސްޓާބަކްސްގެ ޗީފް އެގްޒެކްޓިވް އޮފިސަރު ސީއީއޯ) ގެ މަގާމަށް އާ މީހަކު އިއްޔެ އައްޔަންކޮށްފި އެވެ.
އެ ކުންފުނިން އިއްޔެ ބުނީ ސްޓާބަކްސްގެ އާ ޗެއާމަނަކީ އަދި އާ ސީއީއޯ އަކީ ބްރަޔަން ނިކޮލް ކަމަށެވެ. އޭނަ މަގާމުގެ މަސްއޫލިއްޔަތުތަކާ ހަވާލުވެވަޑައިގަތުމަށް ހަމަޖެހިފައި ވަނީ އަންނަ މަހުގެ 9 ގަ އެވެ.
ސްޓާބަކްސްގެ އާ ސީއީއޯއަކަށް ނިކޮލް ހަމަޖެއްސި އިރު، އޭނަ މިހާރު ހުންނެވީ ރެސްޓޯރަންޓް ޗެއިނެއް ކަމަށްވާ ޝިޕްޓޯލްގެ ސީއީއޯގެ މަގާމުގަ އެވެ.
ދުނިޔޭގެ އެކި ހިސާބުތަކުގައި ކޮފީގެ ވިޔަފާރި ވަރަށް ފުޅާކޮށް ހިންގަމުން އަންނަ ސްޓާބަކްސްގެ ސީއީއޯގެ މަގާމުގައި އެންމެ ފަހުން ހުންނެވީ އިންޑިއާ ދަރިކޮޅުގެ އެމެރިކާ ރައްޔިތެއް ކަމަށްވާ ލަކްޝްމަން ނަރަސިމްހަމް އެވެ. އޭނަ އެ މަގާމަށް އައްޔަންކުރީ 2022 ގެ ސެޕްޓެމްބަރު މަހުގެ ތެރޭގަ އެވެ.
މީޑިއާތަކުން ބުނީ ސްޓާބަކްސް އިން އާ ސީއީއޯއަކު އައްޔަންކުރީ ލަކްޝްމަން މަގާމު ދޫކޮށްލައްވަން ނިންމެވުމާ ގުޅިގެން ކަމަށެވެ.
އެހެންވެ އަލަށް އައްޔަންކުރި ސީއީއޯ މަގާމާ ރަސްމީކޮށް ހަވާލުވަންދެން ސީއީއޯގެ މަގާމު މިހާރު ވަނީ ކުންފުނީގެ ޗީފް ފައިނޭންޝަލް އޮފިސަރު (ސީއެފްއޯ) ރަޗެލް ރަގެރީއާ ހަވާލުކޮށްފަ އެވެ.