އެންމެ ބޯކޮށް ވާރޭ ވެހުނީ މާލެ އަށް

ފާއިތުވި 24 ގަޑިއިރު އެންމެ ގިނައިން ވާރޭ ވެހުނީ މާލެއަށް ކަމަށް މޫސުމާ ބެހޭ ގައުމީ އިދާރާ އިން ބުނެފި އެވެ.

އެތަނުން ބުނީ އިއްޔެ ހެނދުނު 8:00 އިން މިއަދުގެ ހެނދުނު 8:00 އަށް މާ ލެއަށް ޖުމްލަ 89.4 މިލިމީޓަރުގެ ވާރޭ ވެހިފައިވާ ކަމަށެވެ.

ދެން އެންމެ ގިނައިން ވާރޭ ވެހުނީ އިވަނީ އއ. ތޮއްޑުއަށެވެ. އެ ރަށަށް 70.6 މިލިމީޓަރުގެ ވާރޭ ވެހިފައިވެ އެވެ.

ފާއިތުވި 24 ގަޑިއިރު ތެރޭގައި ރާއްޖޭގެ އެކި ހިސާބުތަކަށް ބޯކޮށް ވާރޭ ވެހި، ފެންބޮޑުވެ އެކި ވަރުގެ ގެއްލުންތައް ވެސް ވެފައިވެ އެވެ. އަދި ވައި ގަދަވުމުގެ ސަބަބުން ބައެއް ރަށްރަށުން ރުއްގަސް ވެސް ވެއްޓިފައިވެ އެވެ.

މެޓް އޮފީހުން ބުނި ގޮތުގައި ފާއިތުވި 24 ގަޑިއިރު އެންމެ ބޮޑަށް ވައިގަދަވި ކަމަށް ރެކޯޑްކުރެވިފައި ވަނީ ހދ. ހަނިމާދު އާއި މާލެއަށް ކަމަށެވެ. އެއީ ގަޑިއަކު 47 މޭލު ބާރުމިނުގަ އެވެ.

މެޓް އޮފީހުން ލަފާކޮށްފައިވާ ގޮތުގައި ކުރިއަށް އޮތް 24 ގަޑިއިރު އުތުރާއި މެދުރާއްޖެތެރޭގެ އަތޮޅުތަކަށް ވައިގަދަވެ ކަނޑުތައް ވެސް ގަދަވާނެ އެވެ. އަދި މިއަދު މެންދުރުފަހުން ފެށިގެން ދެކުނުގެ ރަށްތަކަށް ވެސް ވައި ގަދަވާނެ ކަމަށް ލަފާކޮށްފައިވެ އެވެ.