ބިދޭސީން ވެސް ރާއްޖެ އިން ބޭރަށް ދަތުރުކުރާ އިރު "ޓްރެވެލާ ޑެކްލަރޭޝަން" ފޯމު ފުރަން ނުޖެހޭ ގޮތަށް އިމިގްރޭޝަނުން ހަމަޖައްސައިފި އެވެ.
އެ އިދާރާ އިން ބުނީ މާދަމާ އިން ފެށިގެން އަމަލު ކުރަން ފަށާ ގޮތަށް އެ އުސޫލު ހަމަޖެއްސީ ރައީސް ޑރ. މުޙައްމަދު މުއިއްޒުގެ ވިސްނުންފުޅާ އެއްގޮތަށް، ރާއްޖެ އަންނަ އަދި ރާއްޖެއިން ފުރާ ހުރިހާ ފަރާތްތަކަށް ދަތުރުފަތުރު ކުރުމުގައި ލުއި ފަސޭހަ އިންތިޒާމުތަކެއް ހަމަޖެއްސުމުގެ ގޮތުން ކަމަށެވެ.
ކޮވިޑް-19 އާ ގުޅިގެން ރާއްޖޭގެ ބޯޑަރުގެ ޚިދުމަތް ހަރުދަނާކޮށް ރައްކާތެރިކުރުމުގެ ގޮތުން "ޓްރެވަލް ހެލްތު ޑެކްލަރޭޝަން" ފޯމެއް ފުރަން ޖެހޭ ގޮތަށް ކަނޑައެޅީ ޖުލައި 15، 2020 ގަ އެވެ. އަދި އޭގެ ފަހުން މާޗް 14، 2021 ގައި އެ ފޯމުއޮންލައިންކޮށް ފުރިހަމަކުރާ އެމްބަކޭޝަން/ޑިސްއެމްބަކޭޝަން ފޯމެއްގެ ގޮތުގައި ހަމަޖައްސައި "ޓްރެވެލާ ޑެކްލަރޭޝަން" ގެ ނަމަށް ބަދަލުކޮށްފައިވެ އެވެ.
އެކަމަކު ނޮވެމްބަރު 20، 2023 ގައި ވަނީ ރާއްޖެއިން ބޭރަށް ފުރާ އަދި ރާއްޖެއަށް އަނބުރާ އަންނަ ދިވެހިން ވެސް އެ ފޯމް ފުރިހަމަ ކުރަން ނުޖެހޭ ގޮތަށް ނިންމި އެވެ.
ނަމަވެސް ރާއްޖެ އަންނަ ބިދޭސީން ކުރިއެކޭ އެއްގޮތަށް ރާއްޖެ އައުމުގެ 96 ގަޑިއިރު ކުރިން "ޓްރެވެލަ ޑެކްލަރޭޝަން ފޯމް" ފުރިހަމަކޮށް ހުށަހަޅަން ޖެހޭނެ އެވެ.