މި މަހު ބާއްވަން ހަމަޖެހިފައިވާ "އިލްމުވެރިންގެ މަހާސިންތާ" އަށް އިސްލާމިކް މިނިސްޓްރީން ތައްޔާރުވާން ފަށައިފި އެވެ.
މި މަހުގެ 24 އަށް ތާވަލުކޮށްފައި އޮތް މި މަހާސިންތާ އަކީ އެ މިނިސްޓްރީން މި އަހަރަށް އެކި ދާއިރާތަކަށް ހާއްސަކޮށްގެން ބާއްވަން ނިންމި މަހާސިންތާތަކުގެ ތެރެއިން ފުރަތަމަ މަހާސިންތާ އެވެ.
އިސްލާމިކް މިނިސްޓްރީން ބުނީ "އިސްލާމީ ރިވެތި އަހުލާގާއި އަހުލާގު ހިމާޔަތް ކުރުމުގައި އިލްމުވެރިންގެ ދައުރު" އެ މައުޟޫއަށް ހާއްސަކޮށްގެން ބާއްވާ "އިލްމުވެރިންގެ މަހާސިންތާ" ގައި ބޭރުގެ ދެ އިލްމުވެރިޔަކު ވެސް ބައިވެރިވެވަޑައިގަންނަވާނެ ކަމަށެވެ. އެ ދެ ބޭފުޅުންނަކީ ސައުދީ އަރަބިއްޔާގެ ޖަމިއްޔަތު ވުފޫދުލް ހަރަމްގެ ސީއީއޯ ޑރ. ފަހުދު ބުން ނާސިރު އަލް ޤަރުނީ އާއި މަސްޖިދުލްހަރާމްގެ ފަތުވާ ކޮމިޓީގެ މެންބަރެއް ކަމަށްވާ ޕްރޮފެސަރު ޑރ. ހަމްދާން ބުން ބުރައިލް އައްސުލަމައިމީ އެވެ.
މިނިސްޓްރީން ބުނެފައި ވަނީ މަހާސިންތާތަކުގެ ބޭނުމަކީ ބޭނުމަކީ ކަނޑައަޅާފައިވާ ދާއިރާތަކުން ހިދުމަތް ދިނުމުގައި މަސައްކަތްކުރާ ފަރާތްތަކުގެ މައުލޫމާތު މުއްސަނދިކޮށް ހޭލުންތެރި ކުރުވުން ކަމަށެވެ. އަދި މުޖުތަމަޢުއަށް ސައްހަ އަޤީދާ ކިޔައި ދިނުމުގައި ދީނީ އިލްމުވެރިންގެ ދައުރު ފުޅާކުރުމަކީ ވެސް މަހާސިންތާތަކުގެ މަގުސަދެެއް ކަމަށް މިނިސްޓްރީން ބުނެފައިވެ އެވެ.
އަންނަ މަހު ވެސް ދެ މަހާސިންތާއެއް ބާއްވަން ތާވަލުކޮށްފައިވެ އެވެ. އެއީ ސެޕްޓެމްބަރު 4 އަށް ތާވަލުކޮށްފައި އޮތް ޖަމިއްޔާތަކުގެ މަހާސިންތާ އާއި ސެޕްޓެމްބަރު 21 ގައި ބާއްވަން އޮތް އިމާމުންގެ މަހާސިންތާ އެވެ.