އިންޑިއާގެ ގައުމީ ދޫނި، ސާމަރާދޫނީގެ މަހުން ރިހަ ކައްކައިގެން ކެއްކި މައްސަލައެެއްގައި މީހަކު ހައްޔަރުކޮށްފި އެވެ.
މީޑިއާތަކުން ބުނީ އެ މައްސަލައިގައި ހޯމަ ދުވަހު ހައްޔަރުކުރީ ޓެލަންގަނާ ސްޓޭޓަށް ނިސްބަތްވާ ކޮދަމް ޕްރަނޭ ކުމާރު ކިޔާ މީހެއް ކަމަށެވެ.
އޭނަ ހައްޔަރުކުރީ ސާމަރާދޫންޏެއް ކަތިލައިގެން އެއިން ރިހަ ކައްކައިގެން ކާ މަންޒަރު ފެންނަ ވީޑިއޯއެއް ވެސް އޭނަގެ ޔޫޓިިއުބް ޗެނަލްގައި އާންމުކުރުމާ ގުޅިގެންނެވެ. އެ ވީޑިއޯއާ ގުޅިގެން ވަރަށް ގިނަ ބަޔަކު ކުމާރުގެ އެ އަމަލު ކުށްވެރިކޮށް އޭނަ ހައްޔަރު ކުރަން ގޮވާލި އެވެ.
ފަހުން ވީޑިއޯ ވަނީ ޑިލީޓްކޮށްލައިފަ އެވެ.
ސާމަރާދޫނީގެ މަހުން ރިހަ ކައްކައިގެން ކެއި މައްސަލައިގައި ކުމާރު ހައްޔަރުކޮށް ޖަލުގައި ބަންދުކޮށްފައިވާ އިރު، ބަންދަށް 14 ދުވަސް ޖަހާފައިވެ އެވެ. އަދި ފުލުހުން މިހާރު އަންނަނީ މިކަން އިތުރަށް ތަހުގީގު ކުރަމުންނެވެ.
ސާމަރާދޫންޏަކީ އިންޑިއާގައި ހިމާޔަތްކޮށްފައިވާ ދޫންޏެކެވެ.