މިސަރުކާރުން ހަވާލުވިއިރު ހަވާލުކޮށްފައިވާ ކުޅިވަރު މަޝްރޫއުތަކުގެ އަގު ދައުލަތުގެ ދެ އަހަރުގެ ބަޖެޓަށްވުރެ ބޮޑު ކަމަށް ސްޕޯޓްސް މިނިސްޓަރު އަބްދުﷲ ރާފިއު ވިދާޅުވެއްޖެއެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި މިނިސްޓަރާ ސުވާލު ކުރުމަށް ލިބުނު ފުރުސަތުގައި ކަނޑިތީމު ދާއިރާގެ މެންބަރު އަމީން ފައިސަލް ކުރެއްވި ސުވާލަށް ޖަވާބު ދެއްވަމުން މިނިސްޓަރު ރާފިއު ވިދާޅުވީ ރާއްޖޭގެ ކަންކޮޅުތަކުގައި ކުޅިވަރު މަޝްރޫއުތައް ކުރިއަށް ގެންދާނީ ވަކިރަށެއް ސަރަހައްދެއް ތަފާތު ކުރުމެއްނެތި ކަމަށެވެ.
ކުޅިވަރު ޕްރޮޖެކްޓްތައް ކުރިއަށް ގެންދިއުމުގައި ގޮންޖެހުން ތަކެއް ހުރިކަން ފާހަގަކޮށް މިނިސްޓަރު ވިދާޅުވީ މިސަރުކާރުން ހަވާލުވިއިރު ކުޅިވަރުގެ ގިނަ ޕްރޮޖެކްޓްތަކެއް ހުރިކަމަށެވެ. އެގޮތުން ކުޅިވަރުގެ ހުރިހާ ޕްރޮޖެކްޓެއް އެއްކޮށްލުމުން އޭގެ އަގު ދައުލަތުގެ ދެ އަހަރުގެ ބަޖެޓަށްވުރެ ބޮޑު ކަމަށް ވިދާޅުވިއެވެ.
އެހެންކަމުން މިހާރު ހުރި މަޝްރޫއުތަކުގެ ތެރެއިން އިސްކަންދޭ ތަރުތީބަކުން އެންމެ މުހިންމު ކަންކަން ބަޖެޓްގައި ހިމަނައިގެން ކުރިއަށްދިއުމުގެ ވިސްނުން ހުރި ކަމަށް މިނިސްޓަރު ވިދާޅުވިއެވެ. އަދި މިކަންކުރާނީ ކައުންސިލްތަކާ ވާހަކަ ދައްކައިގެން ކަމަށްވެސް ވިދާޅުވިއެވެ.
މިނިސްޓަރު ރާފިއު ވިދާޅުވީ މިހާރުހުރި ޕްރޮޖެކްޓްތައް އަހަރުގެ ފަހުކޮޅު އިއުލާނުކޮށް ކުރިއަށް ގެންދަނީ ބަޖެޓުގައި އެ ކަންކަމަށް ޖަހާފައި ހުރި އަދަދު ކުޑަވުމުން ކަމަށެވެ.