ބަތަލާ ކަންގަނާ ރަނާވަތު، އިންޑިއާގެ ކުރީގެ ބޮޑުވަޒީރު އިންދިރާ ގާންދީގެ ރޯލު ކުޅެފައިވާ ޕޮލިޓިކަލް ޑްރާމާ "އިމަޖެންސީ" ގެ ޓްރެއިލާ މިއަދު ދައްކާލައިފި އެވެ.
އަންނަ މަހުގެ 6 ގައި ބެލުންތެރިންނަށް ދޫކޮށްލަން ހަމަޖެހިފައިވާ މި ފިލްމަކީ ކަންގަނާ އަމިއްލަ އަށް ޕްރޮޑިއުސްކޮށް، ޑައިރެކްޓް ވެސް ކޮށްފަައިވާ ފިލްމެކެވެ. "އިމަޖެންސީ" ގައި ދައްކުވައި ދޭނީ އިންދިރާގެ ޒައާމަތުގައި އިއުލާންކުރި ކުއްލި ހާލަތާއި އެއާ ވިދިގެން އެ ގައުމުގެ ސިޔާސީ މަސްރަހު ހޫނުވެގެން ދިޔަ ގޮތެވެ.
ގިނަ ބައެއްގެ ނުރުހުމާއި ފާޑުކިޔުންތައް އިންދިރާ އަށް އަމާޒުވި ކުއްލި ހާލަތަކީ 21 މަހަށް ދެމިގެން ދިޔަ ކަމެކެވެ. އެއީ 1975-1977 އަށެވެ. އިންޑިއާގެ ހަމައެކަނި އަންހެން ބޮޑުވަޒީރު އިންދިރާ އަވަހާރަކޮށްލީ އޮކްޓޯބަރު 31، 1984 ގަ އެވެ.
ކަންގަނާގެ "އިމަޖެންސީ" ގައި ކުއްލި ހާލަތަށް ފަހު ކޮންގްރެސް ޕާޓީ އަށް ނިސްބަތްވި އިންދިރާގެ ސިޔާސީ ކެރިއަރަށް އެރި ލޮޅުންތައް ދައްކުވައި ދޭނެ އެވެ.
މި ފިލްމުގެ ކާސްޓްގައި އަނޫޕަމް ކޭރް، މަހީމާ ޗައުދަރީ، ޝްރެޔަސް ތަލްޕަޅޭ، މިލިންދު ސޯމަން، ވިޝާލް ނައިރް އަދި މަރުވެފައިވާ އެކްޓަރު ސަތިޝް ކޯޝިކް ހިމެނެ އެވެ.
"އިމަޖެންސީ" ބެލުންތެރިންނަށް ދޫކޮށްލަން ތައްޔާރުވާ އިރު، ކަންގަނާ އަކީ މިހާރު އިންޑިއާގެ ގާނޫނު ހަދާ މަޖިލީހުގެ ތިރިގެ، ލޯކް ސަބާގެ މެންބަރެކެވެ. އެއީ ވެރިކަން ކުރާ ބީޖޭޕީގެ މެންބަރެއްގެ ގޮތުގަ އެވެ.