އެކިއެކި ސިޔާސީ ސަބަބުތަކަށްޓަކައި ގައުމުތަކާ ދެކޮޅަށް ކެމްޕޭންތައް ހިންގުމަކީ އިންވެސްޓަރުން ރާއްޖެއައުމަށް އޮތް ހުރަހެއް ކަމަށް ކެންދޫ ދާއިރާގެ މެންބަރު މައުރޫފް ޒާކިރު ވިދާޅުވެއްޖެއެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި ފޮރިން އިންވެސްޓްމެންޓްގެ ބިލަށް ވާހަކަ ދައްކަވަމުން މައުރޫފް ވިދާޅުވީ މި ބިލަކީ މިދިޔަ ސަރުކާރުން ކުރީގެ މަޖިލީހަށް ހުށަހަޅާފައިވާ ބިލެއް ކަމަށާއި، މިސަރުކާރުން ބިލު ހުށަހަޅާފައިވަނީ ބައެއް ބަދަލުތައް ގެނައުމަށްފަހު ކަމަށެވެ.
ރާއްޖޭގެ މާހައުލަކީ ފޮރިން އިންވެސްޓްމެންޓްތަކަށް ފަހި މާހައުލަކަށް ވާންޖެހޭކަން ފާހަގަކޮށް މައުރޫފް ޒާކިރު ވިދާޅުވީ ފެންނަނީ ސިޔާސީ ބޭނުމަށް އަދި ސިޔާސީ ސަބަބުތަކަށްޓަކައި ފޮރިން އިންވެސްޓަރުން ބިރުގަންނަގޮތަށް ރާއްޖޭގައި ކަންކަން ކުރެވޭތަން ކަމަށެވެ. މިބިލުގައިވެސް އިންވެސްޓްމެންޓްތައް ނެގޭނެ ގޮތާއި ނަގާނެ އުސޫލުތައް މާބޮޑަށް ބަޔާންކޮށްފައި އޮތުމަކީ އިންވެސްޓަރުން އެކަމާ ފަސްޖެހޭނެ ކަމެއްކަމަށެވެ.
މީގެއިތުރުން ސިޔާސީ ސަބަބުތަކަށްޓަކައި އެއިރެއްގައި އޮންނަ ސަރުކާރަކާމެދު ހިތްހަމް ނުޖެހިގެން ފޮރިިން އިންވެސްޓަރުންނާއި ގައުމުތަކާ ދެކޮޅަށް ކެމްޕޭންތައް ހިންގާ ރޭވުމުގެ ނަތީޖާއަކީ ރާއްޖެއަށް އިންވެސްޓަރުން އައުމަށް އޮތް ހުރަހަކަށް އެކަންވުން ކަމަށްވެސް މައުރޫފް ވިދާޅުވިއެވެ.
"އަޅުގަނޑުމެން މާދަމާ ނުކުމެ، އިންޑިއާ އައުޓް، ޗައިނާ އައުޓް، އެމެރިކާ އައުޓް، މިހެން ގޮވާންވެއްޖެނަމަ އެގައުމުތަކުގެ އިންވެސްޓަރުން ރާއްޖެ އައުމާމެދު ކަންބޮޑުވުން ފާޅުކުރާނެ." މެންބަރު މައުރޫފް ވިދާޅުވިއެވެ.
މައުރޫފް ވިދާޅުވީ ޖީއެމްއާރް ބޭރުކުރިގޮތާމެދު މިއަދު ވިސްނަންޖެހޭ ކަމަށާއި ސިޔާސީ ނުތަނަވަސްކަމުގެ ބޭނުންހިފާ ބޭރުގެ ފޮރިން އިންވެސްޓްމެންޓްތައް ބޭރުކޮށްލުމުގެ މަގުސަދުގައި އެފަދަ ކަންކަން ކުރުމުން ފޮރިން އިންވެސްޓަރުން ނުލިބޭނެ ކަމަށެވެ.