ރައްޔިތުންގެ މަޖިލީހުގެ ބައެއް މެންބަރުން މަޖިލީހުގައި ދައްކާ ވާހަކަތަކާއި އަމަލުކުރާގޮތުން މަޖިލީހުގެ އިތުބާރު ގެއްލޭކަމަށް ކަނޑިތީމު ދާއިރާގެ މެންބަރު އަމީން ފައިސަލް ވިދާޅުވެއްޖެއެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި ވާހަކަ ދައްކަވަމުން މެންބަރު އަމީން ފައިސަލް ވިދާޅުވީ ނަމޫނާ ދައްކަންޖެހެނީ މަޖިލީހުގެ ތެރެއިން ކަމަށާއި އިތުބާރު ގެއްލެނީ މަޖިލީހުގެ ތެރެއިން ކަމަށެވެ. މަޖިލީހުގެ ތެރެއިން މެންބަރުން ކުރާ ފުރައްސާރައާއި މަލާމާތުގެ ތެރެއިން މަޖިލީހުގެ އިތުބާރު ގެއްލޭ ކަމަށް ވިދާޅުވިއެވެ.
އެގޮތުން ޕީއެންސީގެ މެންބަރުން ތެދުވެ މަޖިލީހުގައި އެމްޑިޕީގެ މެންބަރުން ތިބި އަދަދުގެ ވާހަކަ ދައްކާ، ވަޒީރަކާ ސުވާލު ކުރުމުން އެއީ ވަގުތު ދުއްވާލަން ކުރާކަމެއްގެ ގޮތުގައި ސިފަކުރަމުންދާކަން ފާހަގަކުރެއްވިއެވެ. އަދި ވިދާޅުވީ މަޖިލީހުގެ ތެރެއިން މެންބަރުން ކުރާ މިފަދަ ކަންކަމުން ރައްޔިތުން މަޖިލީހާމެދު ކުރާ އިތުބާރު ގެއްލޭ ކަމަށެވެ.
"މަޖިލީހުގެ އެއް މެންބަރަކު ތެދެވެ މުޅި މަޖިލީހުގެ އިތުބާރު ގެއްލުވާލާ، ދިވެހި ރައްޔިތުންގެ މެދުގައި، މިތަނަކީވެސް ބޭކާރު ތަނެއްގެ ގޮތުގައި ހަދަނީ މަޖިލީހުން." މެންބަރު އަމީން ފައިސަލް ވިދާޅުވިއެވެ.
މީގެއިތުރުން ފޮރިން އިންވެންޓްމެންޓްގެ ބިލަށް ވާހަކަ ދައްކަވަމުން މެންބަރު އަމީން ފައިސަލް ވިދާޅުވީ ފޮރިން އިންވެސްޓަރުން ރާއްޖެއަށް ކުރަމުން އައި އިތުބާރު ގެއްލެނީ ދިވެހިންގެ ތެރެއިން މަދުބަޔަކު ސިޔާސީ ބޭނުމަށްކުރާ އެކިކަންކަމުގެ ސަބަބުން ކަމަށެވެ.
ޖީއެމްއާރްގެ ވާހަކައަށް އަލިއަޅުވާލާ ވާހަކަ ދައްކަވަމުން މެންބަރު އަމީން ފައިސަލް ވިދާޅުވީ، އެ އެއްބަސްވުމަކީ އުފެދުމުގައިވެސް ބާތިލު އެއްޗެއްކަމަށް ބައެއް ފުންނާބުއުސް ބޭފުޅުން އޭރު ވިދާޅުވި ކަމަށާއި ނަމަވެސް އެކަމުގައި ރާއްޖޭގެ އިގްތިސާދު އިނދަ ޖައްސާލި ކަމަށެވެ. އަދި ސިޔާސީ މަންފާއަށް އަވައްޓެރި އަދި އެހެންވެސް ގައުމުތަކާ ޖެހިގަތުމަކީ އެކަމުގެ ގެއްލުން ރާއްޖެއަށް ލިބޭ ކަމެއް ކަމަށް ވިދާޅުވިއެވެ.