ރައްޔިތުންނާ ގުޅުންހުރި ޓެކްސްތައް ބޮޑުކުރުމުގެ ވިސްނުމެއް ސަރުކާރުން ނުގެންގުޅޭ ކަމަށް ފިނޭންސް މިނިސްޓަރު ޑރ. މުހައްމަދު ޝަފީގު ވިދާޅުވެއްޖެ އެވެ.
ރައްޔިތުންގެ މަޖިލީހުގެ މާލިއްޔަތު ކޮމިޓީގައި މިއަދު ވާހަކަދައްކަމުން ޝަފީގު ވިދާޅުވީ އަންނަ އަހަރާއި 2026 ވަނަ އަހަރު ދައުލަތުން ދައްކަން ޖެހޭ ދަރަނި އަދާކުރުމަށްޓަކާ ބޭރު ފައިސާ އިން އާމްދަނީ އިތުރު ކުރަން އެއާޕޯޓް ޑިވެލޮޕްމަންޓް ޓެކްސްއާއި ގްރީން ޓެކްސް ބޮޑު ކުރަން ނިންމާފައިވާ ކަމަށެވެ. ނަމަވެސް އާއްމު ރައްޔިތުންނާ ގުޅުން ހުރި އެއްވެސް ޓެކުހެއް ބޮޑުކުރުމުގެ ވިސްނުމެއް ނެތް ކަމަށް ޝަފީގު ވިދާޅުވި އެވެ.
"ހަގީގަތުގައި ސަރުކާރުގެ ވިސްނުމަކީ އެނގިވަޑައިގަންނަވާނެ ފަދައިން ޓެކްސްތަކާއި ފީތަކުން ރައްޔިތުންނަށް އޭގެ ބުރައެއް ނުވާ ގޮތަށް ގެންދިޔުން. އެގޮތުން ބަލާއިރު ޖީއެސްޓީ، ޓީޖީއެސްޓީ، ބީޕީޓީ، ވިތުހޯލްޑިން ޓެކްސް، މިފަދަ ޓެކްސްތައް ބޮޑުކުރުމުގެ ވިސްނުމެއް ސަރުކާރުން ނުގެންގުޅޭ،" ޝަފީގު ވިދާޅުވި އެވެ.
މިނިސްޓަރު ވިދާޅުވީ، އެގޮތަށް ނިންމެވީ މިދިޔަ ސަރުކާރުގެ ތެރޭ ވަރަށް ފަހުން ވެސް ޓެކްސްތައް ބޮޑުކޮށްފައިވާތީ ކަމަށެވެ. މިދިޔަ އަހަރުގެ ޖެނުއަރީ މަހުން ފެށިގެެން ޓެކްސް ރޭޓުތައް ބޮޑުކޮށްފައިވާ އިރު، ސަރުކާރުގެ ވިސްނުމަކީ ޓެކްސް ބޭސް ފުޅާކޮށް ދައުލަތަށް ލިބެންޖެހޭ އާމްދަނީ އިތުރުކުރުން ކަމަށްވެސް ޝަފީގު ވިދާޅުވި އެވެ.
މީގެއިތުރުން ސިއްހަތަށް ގެއްލުންވާ ތަކެތީގެ ޑިއުޓީ އާއި ޑިޕާޗާ ޓެކްސް ފަދަ ޑޮލަރުން ނަގާ ފީތައް ބޮޑުކުރަން ވިސްނާފައިވާ ކަމަށް ފިނޭންސް މިނިސްޓަރު ވިދާޅުވި އެވެ.