އައްޑޫގެ ޓޫރިޒަމާ ގުޅޭ ގޮތުން ބާއްވާ "ޑެސްޓިނޭޝަން އައްޑޫ ސަމިޓް: ވަން ބްރޭންޑް ވަން ސްޓޯރީ" އަންނަ ހޮނިހިރު ދުވަހު ބާއްވަން ނިންމައިފި އެވެ.
ކައުންސިލުން އިންތިޒާމުކުރާ މި ސަމިޓް ބާއްވަން ހަމަޖެހިފައި ވަނީ ގަމުގެ އީކްއޭޓަ ވިލެޖްގެ ބްލޫ ލެގޫންގަ އެވެ.
"ޑެސްޓިނޭޝަން އައްޑޫ ސަމިޓް" އައްޑޫގެ ޓޫރިޒަމް ޕްރޮމޯޓްކުރުމާއި އައްޑޫގައި ޓޫރިޒަމަށް މިހާރު ގޮންޖެހުންތަކާއި އެ ދާއިރާ އަށް ކުރިއަރުވައި ފުޅާކުރުމަށް ކުރެވެން ހުރި ކަންތައްތަކާ ގުޅޭ ގޮތުން ފުޅާ ދާއިރާގައި ސްޓޭކްހޯލްޑަރުންނާ އެކީ މަޝްވަރާތައް ކުރިއަށް ގެންދާނެ އެވެ.
ކައުންސިލުން ބުނި ގޮތުގައި މި ސަމިޓްގެ އެންމެ ބޮޑު މަގުސަދަކީ އެންމެން ގުޅިގެން އައްޑޫގެ ޓޫރިޒަމް ޕްރޮމޯޓްކުރަން ބްރޭންޑެއް ވުޖޫދުކޮށް، އެއާ ގޮތަށް ޓޫރިޒަމް ދާއިރާ ކުރިއަރުވަން މަސައްކަތްތައް ކުރުމެވެ.
އައްޑު އަކީ މިހާރު ތިން ރިސޯޓްގެ އިތުރުން ގެސްޓްހައުސްތަކެއް ހިންގަމުން އަންނަ ސިޓީއެކެވެ. އަދި އައްޑޫގައި ޓޫރިޒަމް ތަރައްގީކޮށް ފުޅާކުރަން ތަފާތު ޕްރޮޖެކްޓްތައް ރޭވިފައި އެބަހުއްޓެވެ. އޭގެ ތެރޭގައި އައްޑޫގެ ޓޫރިޒަމް ޒޯންތަކާއި ލޯކަލް ޓޫރިޒަމް ފުޅާކުރުމާއު ހަންކެޑެ އިންޓަގްރޭޓެޑް ޓޫރިޒަމަށް ތަރައްގީ ކުރުމާއި އައްޑޫން ހިއްކާފައިވާ ތިން ރަށެއްގައި ޓޫރިޒަމްގެ ޕްރޮޖެކްޓްތަކެއް ހިންގުމުގެ އިތުރުން އައްސޭރި ޓޫރިޒަމް ޕްރޮޖެކްޓެއް ވެސް ހިމެނެ އެވެ.
"ޑެސްޓިނޭޝަން އައްޑޫ ސަމިޓް" އަންނަ ހޮނިހިރު ދުވަހު ބާއްވަން ތައްޔާރުވަމުން އަންނަ އިރު، 2022 ގައި ވެސް ކައުންސިލުން ޓޫރިޒަމް ފޯރަމެއް ބާއްވާފައިވެ އެވެ.