ހިލޭ ސާބަހަށް މަސައްކަތްކުރާ ނިއު ޒީލެންޑްގެ ޖަމިއްޔާއަކުން ބެހި ކާތަކެތީގެ ޕާރުސަލްތަކެއްގައި ހުރި މެޓާތަކެއްގައި މަސްތުވާތަކެތީގެ ބާވަތެއް އެކުލެވޭ މައްސަލައެެއް ފެންމަތިވުމާ ގުޅިގެން އެ މައްސަލަ ފުލުހުން ބަލަން ފަށައިފި އެވެ.
އެ ގައުމުގެ ފުލުހުން ބުނީ އޯކްލޭންޑްގެ ޖަމިއްޔާއަކުން ބެހި މެޓާގައި މަސްތުވާތަކެތީގެ ބާވަތެއް ކަމަށްވާ މެތަންފެޓަމިން އެކުލެވޭކަން ފާހަގަކުރެވިފައިވާ ކަމަށެވެ. މިކަމާ ގުޅިގެން އޯކްލަންޑް ސިޓީ މިޝަނުން ބުނީ 400 އެއްހާ މީހުންނަށް އެ މެޓާ ލިބިފައިވާ ކަމަށާއި މެތު އެކުލެވޭ މެޓާ ކައިގެން ތިން މީހަކަށް ނޭދެވޭ އަސަރުތަކެއް ކުރި ކަމަށެވެ. އޭގެ ތެރޭގައި ކުޑަކުއްޖަކު ވެސް ހިމެނެ އެވެ.
ނަމަވެސް މެތު އެކުލެވޭ މެޓާ ކައިގެން އެއްވެސް މީހަކަށް ހޮސްޕިޓަލަކުން ފަރުވާ ދޭން ޖެހިފައެއް ނުވެ އެވެ.
މެޓާ ބެހި ޖަމިއްޔާ އިން ބައެއް މީޑިއާތަކަށް ބުނީ މެޓާތަކުގައި މެތު އެކުލެވޭކަން އެނގިފައި ނެތް ކަމަށެވެ.
މިކަން ފުލުހުން އިތުރަށް ތަހުގީގު ކުރަމުން އަންނަ އިރު، ފުލުހުން ވެސް ބުނީ މެތު އެކުލެވޭ މެޓާތަކެއް ގަސްތުގައި ބެހީ ކަމަށް ނުބެލެވޭ ކަމަށާއި މިއީ "އެކްސިޑެންޓަކަށް ވެދާނެ" ކަމަށެވެ.
"އެކަމަކު އަދި ސީދާ ވަކި ގޮތެއް ނިންމަން ދަތި. މައްސަލަ މި އަންނަނީ ތަހުގީގު ކުރަނުން." ފުލުހުން ބުންޏެވެ.