އުރީދޫ އިން ފަށާފައި އޮތް މި އަހަރުގެ "މަސް ރޭސް" ބާއްވާ ދެވަނަ ރަށް ކަމަށްވާ ޅ. ނައިފަރުގެ މުބާރާތް ފަސްކޮށްފި އެވެ.
އެ ކުންފުނިން ބުނީ ކުރިން މާދަމާ ބާއްވަން އޮތް ރޭސް ފަސްކުރީ މޫސުން ގޯސްވެފައިވާތީ ކަމަށެވެ. އެހެންވެ ނައިފަރުގައި "މަސް ރޭސް" ބާއްވާނެ ތާރީހެއް ފަހުން އިއުލާން ކުރާނެ ކަމަށް އުރީދޫން ބުންޏެވެ.
މި އަހަރުގެ މަސް ރޭހުގެ ފުރަތަމަ ރޭސް މިދިޔަ ހަފުތާގެ ހުކުރު ދުވަހު ވަނީ ކ. ހިންމަފުށީގައި ބާއްވައިފަ އެވެ. އެ މުބާރާތުގެ ޗެމްޕިއަނަކީ ސިފްކޯ އެވެ.
އެ ރޭހުގެ ދެ ވަނަ ހޯދީ "ގޯޅިއަންސް" ސްޕޯޓްސް ކްލަބެވެ. ތިން ވަނަ ލިބުނީ ޑިޓިއުން ފިޝިންއަށެވެ.
މުބާރާތުގެ އެންމެ މޮޅު މަސްވެރިއަކަށް ހޮވުނީ ގޯޅިއަންސް ގެ ހަސަން އައްޒާމެވެ. އެންމެ މޮޅު އަންހެން މަސްވެރިޔަކީ ޑިޓިއުން ފިޝިންގެ ފާތިމަތު ފެޒްލީނެވެ.
ނައިފަރުގެ މަސް ރޭސް ފަސްކުރި އިރު، ރޭސް ކުރިއަށް ގެންދަން ނިންމި ތިން ރަށުގެ ތެރެއިން ފަހު ރަށް ކަމަށްވާ ތިނަދޫގައި ރޭސް ބާއްވަން އޮތީ މި މަހުގެ 23 ގަ އެވެ. ނަމަވެސް ނައިފަރު ރޭސް ފަސްކޮށްފައިވާތީ ތިނަދޫ ރޭހުގެ ތާރީހަށް ވެސް ބަދަލު އައުމުގެ ފުރުސަތު ބޮޑެވެ.
މަސްރޭހުގެ އެއް ވަނަ ޓީމަށް 25،000ރ. ލިބެ އެވެ. ދެ ވަނަ އަށް 10،000ރ. އަދި ތިން ވަނަ ޓީމަށް ދެނީ 5،000ރ. އެވެ. އެންމެ މޮޅު މަސްވެރިޔާއަށް 1،000ރ. އަދި އެންމެ މޮޅު ފިޝަވުމަން ނުވަތަ އަންހެން މަސްވެރިޔާ އަށް ވެސް 1،000ރ. ވަނީ ލިބެ އެވެ. އަދި އެންމެ މޮޅު މަސްވެރިޔާ އާއި އަންހެން މަސްވެރިޔާ އަށް ޕިއޯ އަލްޓިމެޓްސީ ސްޕިރިޓް/ގޭންގްސްޓަ (އެޗް/ޑީ) ދޮއްޓެއް ވެސް އިނާމަކަށް ހުށަހަޅާފައިވެ އެވެ.