ރަށްރަށުގެ މަގުބައްތިތައް ރައްކާތެރިކަމުގެ މިންގަނޑުތަކާ އެއްގޮތަށް އިސްލާހުކުރުމަށް ދިން މުއްދަތު އަނެއްކާ ވެސް އިތުރުކޮށްފި އެވެ.
ފެނަކަ ކޯޕަރޭޝަނުން މިއަދު ބުނީ ޔޫޓިލިޓީ ރެގުއުލޭޓަރީ އޮތޯރިޓީން މަގުބައްތިތައް އިސްލާހުކުރުމަށް ދިން މުއްދަތު އަންނަ އަހަރުގެ ފެބްރުވަރީ 25 ވަނަ ދުވަހާ ހަމައަށް އިތުރުކޮށްފައިވާ ކަމަށެވެ.
މިއީ މި މުއްދަތު އިތުރުކުތި ތިން ވަނަ ފަހަރެވެ.
މިދިޔަ ޖޫން މަހުގެ ތެރޭގައި ރ. އުނގޫފާރުގައި މަގުބަތިއަކުން ކުދިންތަކެއްގެ ކަރަންޓްގައި ޖެހި، އޭގެ ތެރެއިން ކުއްޖަކު މަރު ވެސް ވުމާ ގުޅިގެން ފެނަކައިން ވަނީ ރަށްރަށުފެ މަގުބައްތި ހާލަތާ ގުޅޭ އިންސްޕެކްޝަނެއް ހަދައިފަ އެވެ. އަދި އެ އިންސްޕެކްޝަނަށް ފަހު އެ ކުންފުނިން ބުނެފައި ވަނީ 144 ރަށެއްގައި މަގުބައްތިތައް ހުރީ ރައްކާތެރިކަމުގެ މިންގަނޑުތަކާ ހިލާފަށް ކަމަށެވެ.
އެހެންވެ އެކަން އިސްލާހު ކުރަން ކައުންސިލްތަކާ ގުޅިގެން މަސައްކަތްތަކެއް ފަށާފައިވެ އެވެ.
ފެނަކައިން މިއަދު ބުނީ މަގުބައްތިތައް އިސްލާހު ކުރުމަށް ދިން މުއްދަތު އިތުރުކުރީ، ކައުންސިލްތަކަށް މިހާރު ދީފައިވާ މުއްދަތުގައި އެކަން ކުރުމަށް ގިނަ ގޮންޖެހުންތަކެއް ހުރިކަން ފާހަގަވުމުން ރައީސް އޮފީހުގެ ލަފާގެ މަތިން، ޔޫއާރުއޭ އިން ކުރިން ދީފައިވާ މުއްދަތު އިތުރު ކުރުމާ ގުޅިގެން ކަމަށެވެ.