އިންޑިއާގެ ދެކުނުގެ މަޝްހޫރު ބަތަލާ ސަމަންތާ ރޫތު ޕްރަބޫ މިހާރު އޭނަ ކުޅުނު އެމެޒޯން ޕްރައިމް ވީޑިއޯގެ ވެބް ސީރީޒް "ދަ ފެމިލީ މޭން" ގެ ޑައިރެކްޓަރު ރާޖް ނިދިމޮރޫއާ ޑޭޓްކުރަމުން އަންނަ ކަމަށް ރިޕޯޓްތައް ބުނެފި އެވެ.
ސަމަންތާ އަކީ ރާޖް އާއި ޑީކޭ ޑައިރެކްޓްކޮށް އަންނަ ނޮވެމްބަރު މަހު ގެނެސްދޭން ހަމަޖެހިފައިވާ ބޮލީވުޑްގެ ތަރި، ވަރޫން ދަވަންގެ ފުރަތަމަ ސީރީޒް "ސިޓަޑެލް: ހަނީ ބަނީ" ގެ ވެސް ބަތަލާ އެވެ. މީޑިއާތަކުން ބުނީ ސަމަންތާ އާއި ރާޖްގެ ލޯބީގެ ގުޅުން ފެށުނީ ސީރީޒްގެ މަސައްކަތުގެ ތެރޭގައި ކަމަށާއި ގުޅުމާ މެދު އެ މީހުން މިހާރު ވަރަށް ސީރިއަސް ކަމަށެވެ.
ސަމަންތާ އާ ލޯބިވެރިޔަކު ހޯދި ވާހަކަ މީޑިއާތަކުގައި ދެކެވެން މި ފެށީ އޭނަގެ ކުރީގެ ފިރިމީހާ، ދެކުނުގެ އެކްޓަރު ނާގަ ޗައިތަނިއާ އާއި ބަތަލާ ޝޮބީތާ ދުލިޕާލާ މި މަހުގެ 8 ގައި އެންގޭޖްވެފައި ވަނިކޮށެވެ. ސަމަންތާ އާއި ނާގަ 2017 ގައި ކުރި ކައިވެނި ރޫޅައިލީ 2021 ގަ އެވެ.
ސަމަންތާ އާއި ރާޖްގެ ގުޅުމުގެ ވާހަކަ ދެކެވެމުން އަންނަ އިރު، ރާޖަކީ ކުރިން ކައިވެންޏެއްކޮށް ދަރިޔަކު ވެސް ލިބިފައިވާ މީހެކެވެ.
ރާޖްއާ އެކީ "ދަ ފެމިލީ މޭން" ގެ އިތުރުން "ސިޓަޑަލް: ހަނީ ބަނީ" ގައި މަސައްކަތް ކުރުމުގެ ފުރުސަތު ސަމަންތާ އަށް ލިބުނި އިރު، ރާޖް އެންޑް ޑީކޭ މިހާރު ފަށަން ތައްޔާރީތައްވަމުން އަންނަ ސީރީޒް "ރަކްތު ބްރަމަންޑް" ގެ ބަތަލާ އަކީ ވެސް ސަމަންތާ ކަމަށް ރިޕޯޓްތައް ބުނެ އެވެ.