ސީރިއާގައި ހިނގަމުންދާ ދާހިލީ ހަނގުރާމައިގައި ބައިވެރިވުމަށް އެގައުމަށް ދިޔަ ހ. ހިލްޓަން އަޒްލީފު ރައޫފް މަރުވެފައިވާ ކަމަށް އާއިލާގެ މީހަކު "އައްޑޫލައިވް"އަށް ކަށަވަރުކޮށްދީފިއެވެ.
"އައްޑޫލައިވް"އަށް އިތުބާރު ހުރި ގޮތަކަށް މައުލޫމާތު ލިބިފައިވާ ގޮތުގައި އަޒްލީފް މަރުވެފައިވަނީ މިދިޔަ ބުރާސްފަތި ދުވަހުއެވެ. އަޒްލީފް މަރުވެފައިވާކަން އާއިލާއަށް އަންގާފައިވަނީ ސީރިއާގައި އަޒްލީފްއާއި އެކު ހަނގުރާމައަށް ގޮސް ތިބި ދިވެހިންނެވެ. އެމީހުން ވަނީ ސީރިއާގައި އަޒްލީފްގެ ޖަނާޒާ ބާއްވާފައެވެ.
އަޒްލީފްގެ އަންހެނުންނަށް ވަރަށް ފަހުން ފޯނުނުން މެސެޖް ފޮނުވާފައިވާ ކަމަށާއި، ހަނގުރާމައިގެ އިސް ސަފުގައި ހަރަކާތްތެރިވަމުންދާ ކަމަށް ބުނެފައިވެއެވެ.
އަދި ހަބަރެއް ނުވެއްޖެ ނަމަ އޭނާ "ޝަހީދުވީ"ކަމަށް އަންހެނުން ގާތު ބުނެފައިވެއެވެ.
ރައްޔިތުންގެ މަޖިލީހުގެ ކުރީގެ މެމްބަރު ޑރ. އަފްރާޝީމް އަލީ މަރާލުމުގައި ބައިވެރިވިކަމުގެ ތުހުމަތު ކުރެވޭ އަޒްލިފް އާއި އިތުރު ބަޔަކު ސީރިއާއަށް ގޮސްފައިވަނީ މިދިޔަ ޖެނުއަރީ މަހުގެ ތެރޭގައެވެ. އެމީހުން ސީރިއާ ދަތުރުކޮށްފައިވަނީ ގިނަ ގައުމުތަކަށް އެތެރެވުމަށްފަހު ކަމަށް ވެއެެވެ. އެގޮތުން މޭލޭޝިއާ، ބަހްރައިން، ސައުދީއަރަބިއާ އަދި ތުރުކީއަށް އެތެރެވެފައިވެއެވެ.
އަޒްލީފް އާއި އެކު ސީރިއާއަށް ދިޔަ އަނެއް 5 ދިވެހިންވެސް ހަނގުރާމައިގައި އިސްކޮށް ހަރަކާތްތެރިވަމުން އަންނަ ކަމަށް މައުލޫމާތުލިބެއެވެ.