ޖަލު އޮފިސަރުންނަށް "ޖުވެނައިލް ޖަސްޓިސް" ޓްރެއިން ޕްރޮގްރާމެއް ހިންގައިފި އެވެ.
ޖުމްލަ 29 ބައިވެރިންނާ އެކީ މި މަހުގެ 11 އިން ފެށިގެން ފަސް ދުވަހުގެ މުއްދަތަށް ހިންގި މި ޕްރޮގްރާމަކީ ޑިޕާޓްމަންޓް އޮފް ޖުވެނައިލް ޖަސްޓިސް އާއި ކަރެކްޝަނަލް ސާވިސް ގުޅިގެން ހިންގި ޕްރޮގްރާމެކެވެ.
މި ޕްރޮގްރާމްގެ ނިމުން ފާހަގަކުރަން އިއްޔެ ބޭއްވި ރަސްމިއްޔާތު ޝަރަފުވެރިކޮށް ދެއްވީ ހޯމްލޭންޑް، މިނިސްޓަރު ޢަލީ އިޙުސާނެވެ.
ކަރެކްޝަން ސާވިސް އިން ބުނީ ޖަލު އޮފިސަރުންނަށް ހިންގި "ޖުވެނައި ޖަސްޓިސް" ޓްރެއިނިން އަކީ ކުޑަކުދިންގެ ޢަދުލުގެ ޤާނޫގެ 26 ވަނަ މާއްދާގައި ބަޔާންކޮށްފައިވާ ގޮތުގެ މަތިން، އެކި ހައިޞިއްޔަތުން ކުޑަކުދިންނާ މުޢާމަލާތްކޮށް، އެ ކުދިންގެ މައްޗަށް ފިޔަވަޅު އެޅުމުގައި މަސައްކަތްކުރާ ފަރާތްތަކަކީ ކުޑަކުދިންނާއެކު މަސައްކަތް ކުރުމަށް ޚާއްސަ ތަމްރީނާއި ހުނަރާއި އިރުޝާދު ލިބިފައިވާ ފަރާތްތަކެއްކަން ކަށަވަރުކުރުމަށްޓަކައި ހިންގި ޕްރޮގްރާމެއް ކަމަށެވެ.
އަދި މީގެ އެންމެ ބޮޑު މަގުސަދަކީ ކުޑަކުދިންނާއެކު މަސައްކަތްކުރާ ފަރާތްތައް ކުޑަކުދިންގެ ޢަދުލުގެ ނިޒާމަށް ހޭލުންތެރިކުރުމާއި، އެ ނިޒާމުގެ ތެރެއިން އެ ކުދިންނަށް ލިބިދޭ ޙައްގުތަކާއި ރައްކާތެރިކަމަށް ހޭލުންތެރިކުރުމެވެ.
ޕްރޮގްރާމްގައި މަލްޓި-ސެކްޓޯރިއަލް ކޯޑިނޭޝަން އެންޑް ކޯޕަރޭޝަން، ކީ ޕްރިންސިޕަލްސް އޮފް ޖުވެނައިލް ޖަސްޓިސް ސިސްޓަމް، ޑައިވަޝަން އަދި ރެސްޓޮރޭޓިވް ޖަސްޓިސްއާ ގުޅޭ ގޮތުން ބައިވެރިންނަށް މަޢުލޫމާތު ދީފައިވެ އެވެ.