ހުޅުމާލޭގައި އަޅަން ނިންމާފައިވާ ވަގުފު އިމާރާތުގެ މަސައްކަތްކޮށް ދޭނެ ބަޔަކު ހޯދަން އިސްލާމިކް މިނިސްޓްރީން ބީލަމަށް ހުޅުވާލައިފި އެވެ.
ހުޅުމާލެ ފޭސް އެކެއްގައި ކޮންޓްރެކްޓަ ފައިނޭންސް އުސޫލުން 12 ބުރިއަށް ހަދަން ނިންމާފައިވާ މި އިމާރާތުގެ މަސައްކަތްކޮށް ދޭން ޝައުގުވެރިވާ ފަރާތްތަކަށް ބީލަން ހުށަހެޅުމުފެ ފުރުސަތު ހުޅުވާލާފައި ވަނީ އަންނަ މަހުގެ 8 އާ ހަމައަށެވެ. އަދި މި ޕްރޮޖެކްޓާ ގުޅޭ ގޮތުން މައުލޫމާތު ދޭން ބާއްވާ ސެޝަނެއް މި މަހުގެ 26 ވަނަ ދުވަހުގެ ހެނދުނު 11:00 ގައި އިސްލާމިކް މިނިސްޓްރީގައި އޮންނާނެ އެވެ.
އިސްލާމިކް މިނިސްޓްރީން ބުނެފައި ވަނީ ވަގުފު އިމާރާތް ތަރައްގީ ކުރާނީ އޮފީސް ބިލްޑިންއެއްގެ ގޮތުގަ އެވެ. އަދި އެ އެތަނަށް ކިޔާނީ "ދާރުއްސަލާމް" އެވެ.
އިސްލާމިކް މިނިސްޓަރު ޑރ. މުހައްމަދު ޝަހީމު އަލީ ސައީދު ވިދާޅުވެފައި ވަނީ ވަގުފު އިމާރާތުން ލިބޭ ފައިސާ ވައްދާނީ މިސްކިތު ފަންޑަށް ކަމަށެވެ.
މާލޭގައި މިހާރު ވެސް "ދާރުލްއީމާން" ގެ ނަމުގައި ނުވަ ބުރީގެ ވަގުފު އިމާރާތެއް ހިންގަ އެވެ. އެތަން ބިނާކުރީ ކުރީގެ ރައީސް އަބްދުﷲ ޔާމީންގެ ވެރިކަމުގައި ޝަހީމް އިސްލާމިކް މިނިސްޓަރަކަށް ހުންނެވި އިރު އެވެ. "ދާރުލްއީމާން" ހުޅުވީ ޖެނުއަރީ 12، 2017 ގަ އެވެ.
ސަރުކާރުން ބުނެފައިވާ ގޮތުގައި ކޮންމެ އަތޮޅެއްގައި ވަގުފު އިމާރާތެއް އެޅުމަކީ އަމާޒެކެވެ.