އެމްޕޮކްސް ނުވަތަ މަކުނުވިދުރީގެ ކޭހެއް ޕާކިސްތާނުން ފެނިއްޖެ އެވެ.
ޕާކިސްތާނުގެ ހެލްތު މިނިސްޓްރީން ބުނީ މި ބައްޔަށް ޕޮޒިޓިވް ވެފައިވަނީ ސައުދީ އަރަބިއްޔާ އިން ޕާކިސްތާނަށް އައި 34 އަހަރުގެ މީހެއް ކަމަށެވެ. މި ބައްޔަށް އޭނާ ޕޮޒިޓިވްވީ ބަލީގެ އަލާމާތްތައް ހުރުމުން ހެދި ޓެސްޓުތަކުން ކަމަށް ބުނެފައިވެ އެވެ.
ނަމަވެސް އޭނާ ޕޮޒިޓިވް ވެފައިވަނީ މި ބަލީގެ ކޮން ވޭރިއަންޓަކަށް ކަން ޔަގީން ވާނީ އިތުރު ޓެސްޓުތަކަށްފަހު ކަމަށް ޕާކިސްތާނުގެ ހެލްތު މިނިސްޓްރީން ބުނެ އެވެ.
އެމްޕޮކްސް ފެތުރޭ މިންވަރު އަވަސްވެ، އެ ބަލީގެ ނުރައްކާ މުޅި ދުނިޔެއަށް ވެސް އޮތް ކަމަށް ކަނޑައަޅައި ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ) އިން މިހާރު ވަނީ އާންމު ސިއްހީ ނުރައްކަލުގެ ހާލަތު އިއުލާނުކޮށްފަ އެވެ.
ގައިން ގަޔަށް އަރާ އެމްޕޮކްސް އަކީ ވައިރަހަކުން ޖެހޭ ބައްޔެކެވެ. އިންސާނެއްގެ ގައިން އެންމެ ފުރަތަމަ އެމްޕޮކްސް ފެނުނީ 1970 ގެ އަހަރުތަކުގައި ޑިމޮކްރެޓިކް ރިޕަބްލިކް އޮފް ކޮންގޯއިންނެވެ.