އިންތިހާބުތަކުގައި ވޯޓުލާން ނުކުންނަ މީހުންގެ އަދަދު މަދުވަމުންދާ ސަބަބު ދެނެގަތުމަށްޓަކައި ސާވޭއެއް ހަދަން އިލެކްޝަންސް ކޮމިޝަން (އީސީ) އިން ނިންމައިފި އެވެ.
އެ ކޮމިޝަންގެ މެންބަރު އަދި ތަރުޖަމާން ޙަސަން ޒަކަރިއްޔާ ދައުލަތުގެ މީޑިއާ، ޕީއެސްއެމްގައި ވިދާޅުވީ މުޅި ރާއްޖެ އަށް އަމާޒުކޮށްގެން އެ ސާވޭ ހަދަން ނިންމާފައި ވަނީ މީހުންގެ ދުވަހާ ގުޅިގެން ކުރިއަށް ގެންދަން ނިންމާފައިވާ ހަރަކާތްތަކުގެ ތެރެއިން ކަމަށެވެ.
ވޯޓްލާ މީހުންގެ ދުވަހުގެ ގޮތުގައި ފާހަގަކުރަނީ އޮގަސްޓް 25 އެވެ. އަދި މިއީ މި ދުވަސް ރާއްޖޭގައި ފާހަގަކުރާ ފުރަތަމަ ފަހަރެވެ.
ޒަކަރިއްޔާ ވިދާޅުވީ ސާވޭ ކުރިއަށް ގެންދާނީ އޮންލައިން ކަމަށެވެ.
"މީގައި ބަލާނ ކޮބައިތޯ ރައްޔިތުން ވޯޓްލާން ނިކުތުމަށް ފަސް ޖެހޭ ސަބަބުތަކަކީ. އެ ސުވާލަށް ޖަވާބު އަޅުގަނޑުމެން ހޯދަން މި އުޅެނީ ސީދާ ވޯޓްލާ މީހާ ކައިރިން. އޮންލައިންކޮށް މި ސަރވޭ ކުރިއަށް ދާނީ،" އޭނަ ވިދާޅުވި އެވެ. "ހާއްސަކޮށް ބައި އިލެކްޝަންތަކުގައި ވޯޓްލާން ޑިމޮކްރެޓިކް ނިޒާމެއްގައި ރައްޔިތުންގެ ބައިވެރިވުން ކުޑަވުމަކީ ނުބައި މިސްރާބަކަށް ދެވޭ ކަމަށް ބެލެވޭނެ ކަމެއް. އަޅުގަނޑުމެން ބޭނުންވަނީ ސަބަބުތައް ދެނެގަތުމަށް ފަހު ކަމާ ގުޅޭ އިދާރާތަކާ އަޅުގަނޑުމެން މަޝްވަރާ ވެސް ކުރާނަން."
ޒަކަރިއްޔާ ވިދާޅުވީ ސާވޭ އަށް ފަހު ކަމާ ގުޅުން ހުރި އިދާރާތަކުން ޤާނޫނަށް ޤަވާއިދަށް ބަދަލު ގެނެސްގެން ކަންކަން ރަނގަޅު ކުރަން ބޭނުންވާ ކަމަށެވެ.
އޭނަ ވިދާޅުވީ ސާވޭގެ ނަތީޖާ އަށް ބިނާކޮށް ފުރިހަމަ އިލްމީ ދިރާސާއެއް ވެސް ކުރިއަށް ގެންދަން އީސީން އޮތީ ނިންމައިފަ އެވެ.