ފަލަސްތީނުގެ ގާޒާ އިން ޕޯލިއޯ ބަލީގެ ކޭހެއް ފެނިއްޖެ އެވެ.
ފަލަސްތީނުގެ ހެލްތު މިނިސްޓްރީން ބުނީ އުރުދުން އަށް ފޮނުވައިގެން ހެދި ޓެސްޓުތަކުން މި ބައްޔަށް ޕޮޒިޓިވް ވެފައިވަނީ 10 މަހުގެ ކުއްޖެއް ކަމަށެވެ. މިއީ 25 އަހަރަށް ފަހު މި ބަލީގެ ކޭހެއް ގާޒާ އިން ފެނުނު ފުރަތަމަ ފަހަރެވެ.
ޕޯލިއޯ އަކީ ނުރައްކާތެރި ބައްޔެވެ. ބަލިޖެހޭ ބައެއް ކުދިންގެ ހަނގަނޑުގެ ބައެއް ހިސާބުތަކުން ވާގިދޫވެ ހިނގަން ނުކުޅެދި އަދި ދާއިމަށް އެހީތެރިކަމަށް ބޭނުން ޖައްސަ އެވެ.
ގާޒާ އިން ޕޯލިއޯ ކޭހެއް ފެނިފައިމިވަނީ މިދިޔަ ޖޫން މަހުގެ 23 ގައި ގާޒާގެ ހަ ސަހައްދަކުން ނެގި ސާމްޕަލްތަކުން ޕޯލިއޯވައިރަސް ޓައިޕް ޓޫ ވީޑީޕީވީ2) ފެނިފައިވާ ކަމަށް ޑަބްލިއުއެޗްއޯ އިން ބުނެފައިވާ ދަނޑިވަޅެއްގަ އެވެ.
އިޒްރޭލުން ގާޒާގައި ގަތުލްއާންމެއް ހިންގަމުންދާއިރު، ގާޒާގެ 640،000 ކުދިންނަށް ވެކްސިން ދިނުމަށް ހަމަލާތައް ހަތް ދުވަހަށް ހުއްޓާލުމަށް އ.ދ ސެކެޓްރީ ޖެނެރަލް އެންޓޯނިއޯ ގުޓަރޭސް ވަނީ ގޮވާލާފަ އެވެ.
މިދިޔަ އަހަރުގެ އޮކްޓޯބަރު މަހުގެ 7 އިން ފެށިން އިޒްރޭލުން ފަލަސްތީނާ ދެކޮޅަށް ހިންގާ ގަތުލްއާންމުގައި ގާޒާގެ ގިނަ ތަންތަން ވަނީ ސުންނާފަތިކޮށްފަ އެވެ. މީގެ ސަބަބުން ފެނާއި ނަރުދަމާ ނަރުދަމާ ނިޒާމު ވެސް ހަލާކުވެ، ރައްޔިތުން ތިބީ އިންސާނީ ވަރަށް ބޮޑު ކާރިސާއެއްގެ ތެރޭގަ އެވެ.
އަނެއްކޮޅުން ފަލަސްތީނުގެ ހުރިހާ ހޮސްޕިޓަލްތަކެއްހެން ވަނީ ބިމާހަމަކޮށްފަ އެވެ.