ވޭޕަށް ބޭނުންކުރާ ތަކެތިން ނަގާ ކަސްޓަމްސް ޑިއުޓީ 200 ޕަސެންޓަށް ބޮޑުކޮށް، ސިނގިރޭޓަކުން 5ރ. ގެ ޑިއުޓީއެއް ނެގުމަށް ފިނޭންސް މިނިސްޓްރީން ހުށަހަޅައިފިއެވެ.
ވޭޕްގެ ބާވަތްތަކުން މިހާރު 25 ޕަސެންޓްގެ ޑިއުޓީއެއް ނަގަމުން އަންނަ އިރު ސިނގިރޭޓަކުން ޑިއުޓީގެ ގޮތުގައި ނަގަމުން އަންނަނީ 3ރ. އެވެ.
މަޖިލީހުގެ މާލިއްޔަތު ކޮމިޓީ އަށް މިދިޔަ ބުދަ ދުވަހު ފިނޭންސް މިނިސްޓްރީން ހުށަހެޅި ކަރުދާހެއްގައި ބުނެފައިވަނީ މި އަހަރުގެ ޑިސެމްބަރު މަހުން ފެށިގެން ނުރައްކާތެރި އެ ދެ ބާވަތުން ޑިއުޓީ ބޮޑު ކުރަން ނިންމާފައިވާ ކަމަށެވެ. ރާއްޖޭގައި މިހާރު ވޭޕްކުރުން ވަރަށް ބޮޑަށް އާންމުވެފައިވާ އިރު، އެ ވިޔަފާރި ފުޅާވަމުންދާކަން ވެސް ފާހަގަ ކުރެވެ އެވެ.
ފާއިތުވި ތިން އަހަރު ރާއްޖެ އަށް ވޭޕް ކުރަން ބޭނުންކުރާ ގިނަ ތަކެތި ވެސް އެތެރެކޮށްފައިވެ އެވެ. އެގޮތުން 2021 ގައި 239،006 ވޭޕް ޔުނިޓް އެތެރެކޮށްފައިވެ އެވެ. އެއީ، 28 މިލިއަން ރުފިޔާގެ ތަކެއްޗެވެ. އަދި 2022 ގައި 283،709 ވޭޕް ޔުނިޓް އެތެރެ ކޮށްފައިވާ އިރު އެއީ 30 މިލިއަން ރުފިޔާގެ ތަކެއްޗެވެ. މިދިޔަ އަހަރު 134076 ވޭޕް ޔުނިޓް އެތެރެކުރި، އޭގެ އަގު 22 މިލިއަން ރުފިޔާ އަށް އަރަ އެވެ.
ފާއިތުވި ތިން އަހަރު ރާއްޖެއަށް ވޭޕް އެތެރެ ކޮށްފައިވަނީ އަމިއްލަ މީހުންނާއި ކުންފުނިތައް ހިމެނޭގޮތަށް 74 ފަރާތެއް މެދުވެރިކޮށެވެ.
ރާއްޖެ އަށް މިހާރު އަހަރެއްގެ މައްޗަށް 1.8 ބިލިއަން ރުފިޔާގެ ނުވަތަ 400 މިލިއަން ޑޮލަރުގެ ސިނގިރޭޓު އެތެރެކުރެ އެވެ.