އައްޑޫގެ ޓޫރިޒަމް ފުޅާކޮށް ކުރިއެރުވުމަކީ ސަރުކާރުގެ ވަރަށް ބޮޑު އަމާޒެއް ކަމަށާއި އެކަން މި ސަރުކާރުން ކުރާނެ ކަމަށް ޓޫރިޒަމް މިނިސްޓަރު އިބްރާހީމް ފައިސަލް ވިދާޅުވެއްޖެ އެވެ.
އައްޑޫ ސިޓީ ކައުންސިލުން އިންތިޒާމުކޮށްގެން މިއަދު ފެށި "ޑެސްޓިނޭޝަން އައްޑޫ ސަމިޓް" ގައި މިނިސްޓަރު ވިދާޅުވީ އައްޑު އަކީ ޓޫރިޒަމް ކުރިއެރުވޭނެ ކަމަށާއި އެކަން ކުރެވޭނެ ގާބިލު މީހުން ވެސް އައްޑޫގައި ގިނަ ކަމަށެވެެ. އެހެންވެ އެންމެެން ގުޅިގެން އެކީގައި މަސައްކަތްކޮށް، އައްޑޫގެ ޓޫރިޒަމަކީ ވަރަށް ބޮޑަށް ކުރިއެރުވިދާނެ ކަމެއް ކަމަށް މިނިސްޓަރު ވިދާޅުވި އެވެ.
ފައިސަލް ވިދާޅުވީ އަައްޑޫގެ ޓޫރިޒަން ކުރިއަރުވަން ސަރުކާރަށް ކުރެވެން ހުރިހާ ކަމެއް ކުރާނެ ކަމަށެވެ. އެގޮތުން ޓޫރިޒަމް ފެސިލިޓީތައް ގާއިމުރުމާއި އެފަދަ ފެސިލިޓީތައް ގާއިމު ކުރަން ބޭނުންވާ ފަންޑް ހޯދައި ދިނުމާއި ގަން އެއާޕޯޓްތެ ތަރައްގީއާ އެކީ އައްޑު އަށް އަންނަ ބޭރުގެ އެއާލައިންތައް އިތުރު ކުރުން ފަދަ ކަންކަން ކުރެވޭނެ ކަމަށް މިނިސްޓަރު ވިދާޅުވި އެވެ.
ފައިސަލް ވިދާޅުވީ އައްޑޫގެ ޓޫރިޒަމް ޕްރޮމޯޓް ކުރުމަކީ ވެސް ވަރަށް ބޮޑު އަމާޒެއް ކަމަށާއި ރާއްޖެ އިން ބޭރުގައި ކުރިއަށް ގެންދަން އެކިއެކި ފެއާތަކާއި އިންވެސްޓް ފޯރަމް އިވެންޓްތަކުގައި އައްޑޫ ޕްރޮމޯޓްކޮށް، އައްޑޫގެ ޓޫރިޒަމް ކުރިއަރުވައި ފުޅާކުރަން ބޭނުންވާ އިންވެސްޓަރިނުން ވެސް ހޯދައި ދޭން ޓޫރިޒަމް މިނިސްޓަރުގެ ހައިސިއްޔަތުން މަސައްކަތް ކުރައްވާނެ ކަމަށް ވިދާޅުވި އެވެ.
"މިހާރު މި ދަނީ ޕޭޕަރެއް އެކުލަވާލަމުން އައްޑޫ ޓޫރިޒަމް ޑިވެލޮޕްމަންޓާއި ބެހޭ ގޮތުން. މި ޕޭޕަރު ފުރަތަމަ ރައީސާ ހިއްސާ ކުރާނަން،" މިނިސްޓަރު ވިދާޅުވި އެވެ. "އެއަށް ފަހު އިކޮނޮމިކް ކައުންސިލަށް ހުށަހަޅައިގެން އެ ހުށަހަޅައިގެން މަސައްކަތްތަކެއް ކުރެވޭނެ."
މިނިސްޓަރު ވިދާޅުވީ މުޅި ރާއްޖޭގެ ޓޫރިޒަމް ކުރިއަރުވަން ވަރަށް ބުރަކޮށް މަސައްކަތް ކުރައްވަމުން ފެންދަވާ ކަމަށާއި ކުރިއަށް އޮތް 10 އަހަރަކީ މުޅި ދުނިޔޭގައި ވެސް ރާއްޖޭގެ ޓޫރިޒަމް އިތުރު އާ ހަރުފަތަކަށް ދާނެ ކަމެއް ކަމަށެވެ.
އައްޑޫ ހަންކެޑެ އިންޓަގްރޭޓެޑް ޓޫރިޒަމަށް ތަރައްގީ ކުރަން މި ސަރުކާރުން އެޕްރީލް މަހުގެ ތެރޭގައި އިފުތިތާހުކޮށްފައިވާ އިރު، އައްޑޫގައި އައްސޭރި ޓޫރިޒަމް މަޝްރޫއެއް ކުރިއަށް ގެންދަން ވެސް އޮތީ ނިންމައިފަ އެވެ.
އައްޑޫގައި މިހާރު ތިން ރިސޯޓް ހިންގަމުން އަންނަ އިރު، ގިނަ އަދަދަކަށް ގެސްޓްހައުސްތައް ވެސް ހިންގަ އެވެ. އަދި އައްޑޫގެ ޓޫރިޒަމް ޒޯންތަކުގައި ލޯކަލް ޓޫރިޒަމް ފުޅާކުރުމާއި އައްޑޫން ހިއްކާފައިވާ ތިން ރަށެއްގައި ޓޫރިޒަމްގެ ޕްރޮޖެކްޓްތަކެއް ހިންގުމަށް ވެސް ރޭވިފައި އެބަހުއްޓެވެ.