މި އަހަރުގެ މިހާތަނަށް ރިލީޒްވި އިންޑިއާގެ އެންމެ ކާމިޔާބު ފިލްމުތަކުގެ ތެރޭގައި ހިމެނޭ "ކަލްކީ: 2898 އޭޑީ" މި މަހުގެ 22 ގައި އެމެޒޯން ޕްރައިމް ވީޑިއޯ އިން ޕްރީމިއާކުރާ ގޮތަށް ހަމަޖެހިއްޖެ އެވެ.
އެ ޕްލެޓްފޯމުން ބެލުންތެރިންނަށް ދޫކޮށްލަން ހަމަޖެހިފައި ވަނީ މި ފިލްމުގެ ތެލެގޫ، ތަމަޅަ، ކަންނާޑާ އަދި މަލަޔާޅަމް ވާޝަނެވެ. އެއީ އިނގިރޭސި ސަބް-ޓައިޓްލްއާ އެކީގަ އެވެ.
ބައެެއް މީޑިއާކުން ބުނީ "ކަލްކީ" ގެ ހިންދީ ވާޝަން ގެނެސްދޭން ހަމަޖެހިފައި ވަނީ ނެޓްފްލިކްސް އިން ކަމަށެވެ. އެކަމަކު އެކަމާ ގުޅޭ ގޮތުން ފިލްމުގެ ޓީމުން އަދި ރަސްމީކޮށް ވަކި އެއްޗެއް ނުބުނެ އެވެ.
"ކަލްކީ" އަކީ ކުޅަދާނަ ތެލެގޫ ޑައިރެކްޓަރު ނާގް އަޝްވިން ލިޔެ، ޑައިރެކްޓްކޮށް، ޖޫން 27 ގައި ގެނެސްދިން ސައިންސް ފިލްޝަން ފިލްމެކެވެ. މީގެ ލީޑް ކާސްޓްގައި ހިމެނެނީ ޕްރަބާސް، ދީޕިކާ ޕަދްކޯން، އަމީތާބް ބައްޗަން، ޑިޝާ ޕަޓާނީ އަދި ކަމަލް ހަސަނެވެ.
ޖުމްލަ 600 ކްރޯޑް ރުޕީސް (72 މިލިއަން ޑޮލަރު) ގެ ބަޖެޓަކުން ހެދި "ކަލްކީ" އަށް ބޮކްސް އޮފީހުގައި 1،100 ކްރޯޑް ރުޕީސް (131.1 މިލިއަން ޑޮލަރު) ގެ އާމްދަނީއެއް ލިބިފައިވެ އެވެ.