ރީތި އަދި އެހާމެ ކާމިޔާބު ފިލްމުތަކެއް ގެނެސްދިން ބޮލީވުޑްގެ ޑައިރެކްޓަރު ސޫރަޖް ބަރްޖަތިއާ އަށް މުޅިން އަލަށް ނެޝަނަލް އެވޯޑް ކަށަވަރުވެއްޖެ އެވެ.
އޭނަ އަށް އެވޯޑް ލިބޭކަން ކަށަވަރުވީ އިއްޔެ އިއުލާންކުރި 70 ވަނަ ނެޝަނަލް އެވޯޑް ލޮބޭ ފަރާތްތައް އިއުލާންކުރުމާ ގުޅިގެންނެވެ. ސޫރަޖަށް އެންމެ މޮޅު ޑައިރެކްޓަރުގެ އެވޯޑް ދޭން ނިންމީ އޭނަ 2022 ގައި ގެނެސްދިން ފިލްމު "އޫޗާއީ" އިންނެވެ.
އާއިލީ ލޯބީގެ ފިލްމުތައް ހަދަން ކުޅަދާނަ ޑައިރެކްޓަރުގެ ފުރަތަމަ ފިލްމަކީ 1989 ގެ "މޭނޭ ޕިޔާރު ކިޔާ" އެވެ. އޭގެ ފަހުން ސޫރަޖް ގެނެސްދިން ފިލްމުތަކަކީ ހަމް އާޕް ކޭ ހޭ ކޯން (1994)، ހަމް ސާތު ސާތު ހޭ (1999)، މޭ ޕްރޭމް ކީ ދީވާނީ ހޫ (2003)، ވިވާ (2006) އަދި ޕްރޭމް ރަތަން ދަން ޕާޔޯ (2015) އެވެ.
ރިޕޯޓްތައް ބުނާ ގޮތުން ސޫރަޖްގެ ކުރިއަށް އޮތް ފިލްމަކީ އޭނަގެ "ޑާލިން" ސަލްމާން ޚާނާ އެކީ ހަދަން ނިންމާފައިވާ "ޕްރޭމް ކީ ޝާދީ" އެވެ.
70 ވަނަ ނެޝަނަލް އެވޯޑްގެ އުސްއަލިތައް:
* އެންމެ މޮޅު ހިންދީ ފިލްމު: ގުލްމޯހަރް
* އެންމެ މޮޅު ތެލެގޫ ފިލްމު: ކަރްތެކިއާ 2
* އެންމެ މޮޅު ތަމަޅަ ފިލްމު: ޕޮނިޔިން ސެލްވަން ޕާޓް 1
* އެންމެ މޮޅު މަލަޔާޅަމް ފިލްމު: ސައުދީ ވެލައްކާ
* އެންމެ މޮޅު މަރާޓީ ފިލްމު: ވާލްވީ
* އެންމެ މޮޅު ކަންނާޑާ ފިލްމު: ކޭޖީއެފް: ޗެޕްޓާ 2
* އެންމެ މޮޅު އެކްޓަރު: ރިޝާބް ޝެޓީ (ކަންޓާރާ)
* އެންމެ މޮޅު ބަތަލާ: ނިތިޔާ މެނަން/މަނާސީ ޕަރޭކް
* އެންމެ މޮޅު ސަޕޯޓިން ބަތަލާ: ނީނާ ގުޕްތާ (އޫޗާއީ)
* އެންމެ މޮޅު ސަޕޯޓިން އެކްޓަރު: ޕަވަން މަލްއުތުރާ (ފައުޖާ)
* އެންމެ މޮޅު ފީޗާ ފިލްމު: އާތަމް (މަލަޔާޅަމް)
* ބެސްޓް ޕޮޕިއުލާ ފިލްމު: ކަންޓާރާ (ކަންނާޑާ)
* އެންމެ މޮޅު ސްކްރީންޕްލޭ: އާތަމް
* އެންމެ މޮޅު ޑައިލޮގް: ގުލްމޯހަރް
* އެންމެ މޮޅު ފިރިހެން ލަވަކިޔުންތެރިޔާ: އަރިޖިތު ސިންގް (ބުރައްމަސްތުރާ)
* އެންމެ މޮޅު އަންހެން ލަވަކިޔުންތެރިޔާ: ބޮމްބޭ ޖަޔަޝްރީ (ސައުދީ ވެލައްކާ)
* އެންމެ މޮޅު ސިނަމަޓޯގްރަފީ: ޕޮނިޔިން ސެލްވަން ޕާޓް 1
* އެންމެ މޮޅު އެޑިޓިން: އާތަމް
* އެންމެ މޮޅު ވީއެފްއެކްސް: ބުރައްމަސްތުރާ
އެވޯޑް ދިނުމުގެ ހަފުލާ އޮންނާނީ އޮކްޓޯބަރު މަހުގެ ތެރޭގަ އެވެ. އެވޯޑްތައް ހަވާލުކޮށް ދެއްވާނީ އިންޑިއާގެ ރައީސް ދުރޯޕަޅީ މުރްމޫ އެވެ.