ވައިބާ ހެކްކޮށްގެގެން ސްކޭމް ހިންގާތީ ސަމާލުވާން ފުލުހުން އަނެއްކާ ވެސް އިލްތިމާސްކޮށްފި އެވެ.
ފުލުހުން ބުނީ ގާތް ރަހުމަތްތެރިންނާއި އާއިލާ މެމްބަރުންގެ އަތުން ފައިސާ ހޯދަން އެކި ނަންބަރުތަކުން ގުޅައިގެން އޯޓީފީ ހޯދައިގެން ވައިބާ ހެކްކުރުމުގެ މައްސަލަތައް އިތުރުވެފައިވާ ކަމަށެވެ.
އެހެންވެ ފޯނަށް އަންނަ ވެރިޕިކޭޝަން/އޯޓީޕީ ކޯޑު އެއްވެސް ހާލަތެއްގައި އެހެން ފަރާތަކަށް ހިއްސާނުކުރަން އެދިފައިވެ އެވެ. ފައިސާ ފޮނުވުމުގެ ކުރިން ކާކުކަން ޔަގީން ކުރުމަށް ފަހު ފައިސާގެ މުއާމަލާތްކުރުމަށް ވެސް ފުލުހުން އެދިފައިވެ އެވެ.
އަދި އެފަދަ ކަމެއް ފާހަގަ ކުރެއްވިއްޖެ ނަމަ ލަސްނުކޮށް ފުލުހުންނަށް ރިޕޯޓްކުރަން ވެސް ފުލުހުން އެދިފައިވެ އެވެ.
ރާއްޖޭގައި ފަހަކަށް އައިސް ތަފާތު ގޮތްގޮތަށް ސްކޭމްތައް ހިންގުން ވަރަށް ބޮޑަށް އިތުރުވެ، މީގެ ސަބަބުން އެކި މީހުންނަށް ބޮޑެތި ގެއްލުންތަކާ ވެސް ކުރިމަތިލާން ޖެހިފައިވެ އެވެ.
މިފަދަ މައްސަލަތައް އާންމުވަމުންދާތީ ފުލުހުން ދާދި ފަހުން ވަނީ އެންޓި-ސްކޭމް ސެންޓަރެއް ވެސް ގާއިމުކޮށްފަ އެވެ.