އައްޑޫގައި ޓޫރިޒަމް ދާއިރާ ކުރި ނާރައި އޮތް އެންމެ ބޮޑު ސަބަބަކީ މި ދާއިރާ ކުރިއަރުވަން އައްޑޫގެ ވިޔަފާރިވެރިންނާއި ރައްޔިތުންގެ ފަރާތުން ލިބެން ހިއްސާ ކުޑަވުން ކަމަށް މޭޔަރު އަލީ ނިޒާރު ވިދާޅުވެއްޖެ އެވެ.
ޑެސްޓިނޭޝަން ބްރޭންޑަކަށް އައްޑޫ ހެދުމާ ގުޅޭ ގޮތުން މިއަދު ގަމުގައި ފެށި "ޑެސްޓިނޭޝަން އައްޑޫ ސަމިޓް" ގައި މޭޔަރު ވިދާޅުވީ އައްޑު އަކީ ޓޫރިޒަމް ތަރައްގީކޮށް، ފުޅާކޮށް ކުރިއެރުވިދާނެ ކިތަންމެ ވަސީލްތަތެކެއް ހުރި ތަނެއް ކަމަށެވެ. ހާއްސަކޮށް އިންސާނީ ވަސީލަތްތަކަށް ބަލާ އިރު، އައްޑު އަކީ ޓޫރިޒަމް ދާއިރާގެ އެތައް ރޮނގަކުން ގާބިލު އަދި ތަޖުރިބާ ހުރި އެތައް ބަޔަކު ނިސްބަތްވާ ސިޓީއެއް ކަމަށް ވިދާޅުވި އެވެ.
އަދި މި ބިމުގެ ގޮތުން ވެސް އައްޑު އަކީ މިހާރު ޓޫރިޒަމަށް ވަރަށް ފަހިކޮށް އޮތް ކަމަށް މޭޔަރު ވިދާޅުވި އެވެ.
ނިޒާރު ވިދާޅުވީ މާލެ އަށް ބަރޯސާވާ ގޮތަށް އައްޑޫގެ ޓޫރިޒަމް ކުރިނޭރުވޭނެ ކަމަށާއި އެކަމަށް އޮތް ހައްލަކީ އައްޑޫގެ އެންމެން ގުޅިގެން ޓޫރިޒަމް ކުރިއަރުވަން ދޭން ޖެހޭ ހިއްސާ އާއި ބައިވެރިވުން ދިނުން ކަމަށް މޭޔަރު ވިދާޅުވި އެވެ. އެގޮތުން އައްޑޫގެ ވިޔަފާވެރިންނާއި ވަކިން ހާއްސަކޮށް، ޓޫރިޒަމް ދާއިރާގައި ހަރަކާތްތެރިވާ އައްޑޫގެ ބޮޑެތި ވިޔަފާވެރިން އައްޑު އަށް އިންވެސްޓްކުރަން ޖެހޭ ކަމަށް ނިޒާރު ވިދާޅުވި އެވެ.
"އަބަދު ވެސް މި ދެކެވެނީ އައްޑޫގެ ޓޫރިޒަމް ކުރިއަރުވަން ޖެހޭ ވާހަކަ. މިހާތަނަށް މުޅިން ދެކެވުނީ ވެސް ވާހަކަ. އަޅުގަނޑު ދަންނަވާނީ މިހާރު ވެސް ވާހަކަ މާ ގިނައިން ދެކެވިއްޖޭ ދެން ހިނގާށޭ، އަމަލީ ގޮތުން މަސައްކަތްތަކެއް ކުރަމާ." އޭނަ ވިދާޅުވި އެވެ.
މޭޔަރު ވިދާޅުވީ އައްޑޫ ގަން އެއާޕޯޓް ތަރައްގީވެގެން އަންނަ އިރު، ބޭރުގެ އެއާލައިންތައް ވެސް އައްޑު އަށް ގެނެވޭނީ ބެޑް ކެޕޭސިޓީ އިތުރު ކުރަން މަސައްކަތްތަކެއްކޮށްގެން ކަމަށެވެ. އެހެންވެ މިހާރު ކުރަން ޖެހިފައި އޮތް އެންމެ މުހިއްމު ކަމަކީ އެއީ ކަމަށް ވިދާޅުވި އެވެ.
"އަޅުގަނޑުމެން އައްޑޫ މީހުން މިކަމަށް ދޭން ހިއްސާ އިތުރު ކުރަންވީ. އައްޑޫގައި ޓޫރިޒަމް ކުރިއަރުވަން އަޅުގަނޑުމެން މި ސިޓީގެ ރައްޔިތުން ނުކުރި ކަމެއް ކުރާކަށް އެހެން ބަޔަކު ނާންނާނެ." މޭޔަރު ވިދާޅުވި އެވެ.
އޭނަ ވިދާޅުވީ އެންމެ ބޮޑުއެދިވަޑައިގަތުމަކީ އެންމެން ގުޅިގެން އައްޑޫގެ ޓޫރިޒަމް ކުރިއަރުވަން މަސައްކަތްކޮށް ދިނުން ކަމަށެވެ. އަދި ކައުންސިލާއި ސަރުކާރު ވެސް އޮތީ މިކަމުގައި ދޭން ޖެހޭ އެހީތެރިކަމަކާއި އެއްބާރުލުމެއް ދޭން ކަމަށް މޭޔަރު ވިދާޅުވި އެވެ.
އެގޮތުން ނިޒާރު ވިދާޅުވީ އައްޑޫގެ ޓޫރިޒަމް ޒޯންތަކުން ބިން ނަގާފައި ތިބި ފަރާތްތަކުން އެ ތަންތަނުގައި އެ މީހުންނަށް މަސައްކަތް ކުރެވެން އޮތް ކެޕޭސިޓީއަކުން މަސައްކަތް ކުރަން ކައުންސިލުން އޮތީ އިޖާބަ ދޭން ތައްޔާރަށް ކަމަށެވެ.
"ތިރީސް ކޮޓަރި ނޭޅޭނެ ކަމަށް ވަންޏާ ފަސް ކޮޓަރި ހަދަން ވެސް އުސޫލު ބަދަލުކޮށްދޭ ގޮތަށް އަޅުގަނޑުމެން މި ތިބީ ތައްޔާރަށް." މޭޔަރު ވިދާޅުވި އެވެ.
ނިޒާރު ފާހަގަކުރެއްވި ގޮތުގައި އައްޑު އަކީ ރާއްޖޭގެ އެހެން ތަންތަނާ ހިލާފަށް ސަރުކާރުން ޕްރޮޕަޓީތަކެއް ގާއިމުކޮށްފައިވާ ތަނެކެވެ. އޭގެ ތެރޭގައި ކެނަރީފް ރިސޯޓާއި ޝަންގްރިއްލާ ރިސޯޓް ފާހަގަކުރެއްވި އެވެ. އަދި މިހާރު ހަންކެޑެ އިިންޓަގްރޭޓެޑް ޓޫރިޒަމް ތަރައްގީ ކުރަނީ ވެސް ސީދާ ސަރުކާރުގެ ފަރާތުން ކަމަށް މޭޔަރު ވިދާޅުވި އެވެ.
ނަމަވެސް މިއީ އަމިއްލަ މީސްމީހުން އިންވެސްޓްކުރަންވީ ދާއިރާއެއްކަން މޭޔަރު ފާހަގަކުރެއްވި އެވެ.