ޅ. ނައިފަރުގެ ބެޑްމިންޓަން އެކެޑަމީގެ 11 ކުޅުންތެރިއަކު ސްރީ ލަންކާގައި މުބާރާތެއްގައި ބައިވެރިވާން އެ ގައުމަށް ފުރައިފި އެވެ.
އެ ކުޅުން ވާދަކުރަން ހަމަޖެހިފައިވާ މުބާރާތަކީ އަންނަ ހޯމަ ދުވަހުން ފެށިގެން މި މަހުގެ 25 އަށް ކުރިއަށް ގެންދަން ހަމަޖެހިފައިވާ "އެންސީޕީބީއޭ އޯލް އައިލެންޑު އޯޕަން ބެޑްމިންޓަން ޗެމްޕިއަންޝިޕް" އެވެ.
މިއީ ލަންކާ ބެޑްމިންޓަންގެ އަހަރީ ކަލަންޑަރުގައި ހިމަނައިގެން ބާއްވާ މުބާރާތެކެވެ.
މި މުބާރާތުގައި ރާއްޖެއިން ތިން އުމުރުފުރާއަކުން ކުޅުންތެރިން ވާދަކުރެއެވެ. އެއީ 13 އަހަރުން ދަށް، 15 އަހަރުން ދަށް އަދި 17 އަހަރުން ދަށެވެ. ތޭރަ އަހަރުން ދަށުގެ އަންހެން ޑިވިޝަނުގައި ދެ ކުޅުންތެރިން އަދި އެމި އުމުރުފުރާގެ ފިރިހެން ޑިވިޝަނުގައި އެއް ކުޅުންތެރިއަކު ވާދަކުރާނެ އެވެ.
މުބާރާތުގެ 15 އަހަރުން ދަށުގެ ފިރިހެން ބައިގައި ނައިފަރު އެކަޑެމީގެ ތިން ފިރިހެން ކުޅުންތެރިން ވާދަކުރާއިރު އަންހެން ބައިގައި ދެ ކުޅުންތެރިން ވާދަކުރެއެވެ. ސަތާރަ އަހަރުން ދަށުގެ ފިރިހެން ބައިގައި ތިން ކުޅުންތެރިން ވާދަކުރާނެ އެވެ.