މީގެ ހަފުތާއެއްހާ ދުވަސް ކުރިން ފެށިގެން ލަންޑަންގައި ޝޫޓްކުރަމުން އަންނަ އަޖޭ ދޭވްގަންގެ ފިލްމު "ސަން އޮދް ސަރުދާރު 2" އިން އެކްޓަރު ވިޖޭ ރާޒް ވަކިކޮށްފި އެވެ.
ވަރަށް ހުނަރުވެރި އެކްޓަރެއްގެ ގޮތުގައި ފާހަގަކޮށްލެވޭ ވިޖޭ، 61، ފިލްމުން ވަކިކުރިކަން ކަށަވަރުކޮށްދީ، ފިލްމުގެ ޕްރޮޑިއުސަރުންގެ ތެރޭގައި ހިމެނޭ ކުމާރު މަންގަތު ބައެއް މީޑިއާތަކަށް ބުނީ ވިޖޭ ފިލްމުން ވަކިކުރީ ފިލްމުގެ ސެޓްގައި އޭނަ އަމަލުތައް ބަހައްޓަމުން ދިޔަ ގޮތާއި ފިލްމުގެ ޓީމަށް ނުކަތާ ވަރަށް ޑިމާންޑްތަކެއް ކުރަމުން ދިޔުމުން ކަމަށެވެ.
އެގޮތުން ފިލްމުގެ މަސައްކަތަށް ހޭދަކުރާ މުއްދަތުގެ ތެރޭގައި އަގުބޮޑު ކޮޓަރިއެއްގައި ބަހައްޓައި ދިނުމާއި ވެނިޓީ ވޭން އަށް ޑިމާންޑް ކުމާއި އޭނަގެ ސްޕޮޓްބޯއި ވެސް ބޮޑު ހޭދައެއްކުރަން ޑިމާންޑް ކުރަމުން ގޮސްފައިވާ ކަމަށް ކުމާރު ބުންޏެވެ.
"އަނެއްކާ ފިލްމުގެ ސެޓްގައި ވަރަށް ރުންކުރުކޮށް އޭނަ އުޅުނީ. މީގެ ސަބަބުން އުނދަގޫތަކެއް ދިމާވަމުން ދިއުމާ ގުޅިގެން ފިލްމުން ބޭރު ކުރަން ނިންމީ." އޭނަ ބުންޏެވެ.
ކުމާރުގެ މި ވާހަކަތަކާ ގުޅިގެން ވިޖޭ ބުނީ އޭނަ ފިލްމުން ވަކިކުރި މައިގަނޑު ސަބަބަކީ އަޖޭ ސެޓަށް އަންނަ ކޮންމެ ވަގުތެއްގައި އޭނަ އަށް މަރުހަބާ ކިޔައި، ކުރުނީސް ނުކުރާތީ ކަމަށެވެ.
"މިކަމުން ދައްކުވައި ދެނީ ނުފޫޒު ގަދަ މީސްމީހުން އެހެން މީހުންނާ މަދު ކަންތައް ކުރާ ގޮތް،" ވިޖޭ ބުންޏެވެ. "އަހަންނަކީ ޝޫޓިން ފެށުމުގެ ބައިގަޑި އިރު ކުރިން ކޮންމެ ދުވަހަކު ސެޓަށް ގޮސް ތައްޔާރުވާ ވެސް މީހެއް. އަހަރެން ގަބޫލެއް ނުކުރަން ވަކި މީހެއްގެ ދަށުގައި ވެގެން މަސައްކަތް ކުރަން ޖެހޭ ކަމަކަށް."
"ސަން އޮފް ސަރުދާރު 2" އިން ވިޖޭ ވަކިކުރީ އަޖޭ އަށް މަރުހަބާ ނުކިޔައިގެން ކަމަށް އޭނަ ދެއްކި ވާހަކަ ކުމާރު ދޮގުކޮށްފައިވެ އެވެ. އޭނަ ބުނީ އަކީ އަޖޭ އެހެން މީހުން ލައްވައި ކުރުނީސް ކުރުވާ ޒާތުގެ އެކްޓަރެއް ނޫން ކަމަށެވެ. އަދި އޭނަ އަކީ ޕްރޮޖެކްޓެއްގައި މަސައްކަތްކުރާ އިރު، އެންމެންނާ ވެސް ގުޅިގެން މަސައްކަތްކުރާ ވަރަށް ޕްރޮފެޝަނަލް އެކްޓަރެއް ކަމަށް ކުމާރު ބުންޏެވެ.
"ސަން އޮފް ސަރުދާރު 2" އަކީ އަޖޭ ވެސް ޕްރޮޑިއުސަރެއްގެ ގޮތުގައި ހިއްސާވާ ފިލްމެކެވެ. މިއީ އޭނަގެ 2012 ގެ "ސަން އޮފް ސަރުދާރު" ގެ ސީކްއެލް އެވެ. މި ފަހަރު ވިޖޭ އަރޯރާ ޑައިރެކްޓްކުރާ ފިލްމުގެ ކާސްޓްގައި މުރްނާލް ތާކޫރް، ޗަންކީ ޕާންޑޭ، ވިންދޫ ދާރާ ސިންގް، ސަންޖޭ ދަތު، ރަވީ ކިޝަން، ކުބްރާ ސައިތު އަދި އަޝްވިނީ ކަލްސޭކަރް ހިމެނެ އެވެ.
ފިލްމީ މަސައްކަތްތަކުގެ ތެރެއިން މީގެ ކުރިން ވެސް ވިޖޭއާ ގުޅޭ މައްސަލަތަކެއް ފެންމަތިވެފައިވެ އެވެ. އެގޮތުން ވިދިއާ ބަލާންގެ 2021 ގެ ފިލްމު "ޝޭރުނީ" ގެ ޝޫޓިން ކުރިއަށް ދިޔަ ދުވަަސްވަރު ކްރޫގައި ހިމެނޭ އަންހެން މެންބަރަކަށް ވިޖޭ ޖިންސީ ގޯނާކުރި މައްސަލެއް ފެންމަތިވެ، އޭނަ ހައްޔަރު ވެސް ކުރި އެވެ. އަދި ފަހުން ދޫކުރީ ކަފާލާތުގެ ދަށުންނެވެ.