ސައުދީ ސަރުކާރުން ހިލޭ އެހީގެ ގޮތުގައި ދިވެހިރާއްޖެއަށް ހަދިޔާކޮށްފައިވާ ކަދުރު ނުލިބިގެން ސ.ހިތަދޫ ކޯޓުގެ މެޖިސްޓްރޭޓް އިބްރާހިމް ނަފީސް އައްޑޫ ސިޓީ ކައުންސިލާއި ދެކޮޅަށް ދައުވާކޮށްފިއެވެ.
މައުލޫމާތު ލިބިފައިވާ ގޮތުގައި އައްޑޫ ސިޓީ ކައުންސިލާއި ދެކޮޅަށް ހިތަދޫ ކޯޓުގެ މެޖިސްޓްރޭޓް ނަފީސް ކޮށްފައިވާ ދައުވާއަށް ޖަވާބުދާރީ ވާނެ ވަކީލަކާއި ބެހޭ މައުލޫމާތު ހިތަދޫ ކޯޓަށް އެންގުމަށް ކައުންސިލަށް މިހާރު ވަނީ އަންގާފައެވެ.
ކައުންސިލާއި ދެކޮޅަށް ހުށަހެޅިފައިވާ މައްސަލައަށް ޖަވާބުދާރީވޭނެ ވަކީލަކު އެންގުމަށް އެދި ހިތަދޫ ކޯޓުން ކައުންސިލަށް ފޮނުވި ސިޓީގެ ކޮޕީއެއް 'އައްޑޫލައިވް' އަށް ވަނީ ލިބިފައެވެ.
ހިތަދޫ ކޯޓުގެ މެޖިސްޓްރޭޓް ނަފީސް ، ކައުންސިލާއި ދެކޮޅަށް ދައުވާ ކުރެއްވާފައިވާއިރު އައްޑޫ ސިޓީ ކައުންސިލާއި ދެކޮޅަށް ހިތަދޫ ކޯޓަށް ހުށަހަޅާފައިވާ ގިނަ މައްސަލަތަކެއް ބައްލަވަމުން ގެންދަވަނީ ވެސް އެބޭފުޅާ ކަން ފާހަގަކޮށްލެވެއެވެ.
ރަށު ކޯޓުތަކުގެ މެޖިސްޓްރޭޓުންނަށް މުސާރައިގެ ގޮތުގައި 23100ރ. ލިބޭއިރު އިސް މެޖިސްޓްރޭޓަކަށް މުސާރައިގެ ގޮތުގައި 25600ރ. ލިބޭކަމަށް ވެއެވެ.