ގަވާއިދާ ހިލާފަށް މާލޭގައި އުޅެމުން ދިޔަ އިތުރު 22 ބިދޭސީއަކު އަތުލައިގެންފި އެވެ.
އިމިގްރޭޝަނުން މިއަދު ބުނީ މާލޭގައި ގަވާއިދާ ހިލާފަށް އުޅޭ ބިދޭސީންނާ ގުޅޭ ގޮތުން "އިމިގްރޭޝަން ވޮޗް" އަށް ލިބިފައިވާ މައުލޫމާތަކާ ގުޅިގެން އިއްޔެ ހެނދުނު ހިންގި ރެއިޑް އޮޕަރޭޝަނެއް ގ. ހީނާމާގޭ ޕާކިން ސަރަހައްދު ބަލައި ފާސްކޮށް 14 ބިދޭސީއަކު އަތުލައިގެންފައިވާ ކަމަށެވެ.
އަދި މާފަންނު ސަރަހައްދުގައި ބިދޭސީން ދިރިއުޅެމުން ދިޔަ އެކަމަޑޭޝަން ބްލޮކެއްގެ މައުލޫމާތު މާލެ ސިޓީ ކައުންސިލުން ހިއްސާކުރުމާ ގުޅިގެން އެތަން ބަލައި ފާސްކޮށް ގަވާއިދާ ހިލާފަށް އުޅެމުން ދިޔަ 8 ބިދޭސީއަކު ވެސް އިމިގްރޭޝަންގެ ބެލުމުގެ ދަށަށް ގެންގޮސްފައިވެ އެވެ.
މިދިޔަ މަހު ތައާރަފުކުރި "އިމިގްރޭޝަން ވޮޗް" 290 ވުރެ އަށް ގިނަ މައްސަލަ ހުށައަޅާފައިވާ ކަމަށް އިމިގްރޭޝަނުން ބުނެފައިވެ އެވެ. ގަވައިދާ ހިލާފަށް އުޅޭ ބިދޭސީން ހޯދަން ހިންގާ އޮޕަރޭޝަންގައި ހައްޔަރުކުރީ މީހުންގެ އަދަދު މިހާރު 200 އިން މައްޗަށް އަރަ އެވެ. އަދި މި ގޮތަށް އަތުލައި ގަނެވޭ މީހުން ފުރުވައިލުމުގެ މަސައްކަތް އަންނަނީ ކުރަމުންނެވެ.