ރާއްޖޭގައި މަސައްކަތް ކުރަން ގެންނަން ބިދޭސީންނާ ގުޅޭ ހިދުމަތްތަކަށް ދައްކަން ޖެހޭ ފީތަކާއި ޖޫރިމަނާނުދައްކާ ނަމަ އެކްސްޕެޓް ސިސްޓަމުން ދެމުން އަންނަ ހިދުމަތްތައް މެދުކަނޑާލާނެ ކަމަށް ހޯމްލޭންޑް މިނިސްޓްރީން ބުނެފި އެވެ.
މިނިސްޓްރީން ރޭ ނެރުނު އިއުލާނެއްގައި ބުނީ ރާއްޖޭގައި ވަޒީފާ އަދާކުރާ ބިދޭސީންނާއި ގުޅިގެން ދޫކުރާ ހުއްދަތަކަށް ދައުލަތަށް ދައްކަންޖެހޭ ފީތަކާއި ޖޫރިމަނާ 100000ރ. އަށް ވުރެ އިތުރުވާ ،ވަޒީފާދޭ ފަރާތްތައް މި މަހުގެ 12 ވަނަ ދުވަހުގެ ކުރިން ފައިސާ ދައްކާ ހަލާސްކުރުމަށް އަންގައި ފަހުން އެ މުހުލަތު މި މަހުގެ ނިޔަލަށް އިތުރުކޮށްފައިވެ އެވެ.
މިނިސްޓްރީން ބުނީ މަހުގެ އަންނަ މަހުގެ 1 ވަނަ ދުވަހުގެ ކުރިން ފައިސާ ނުދައްކާ ފަރާތްތަކާ މެދު ބިދޭސީން ވަޒީފާ އަދާކުރުމާ ބެހޭ ގަވާއިދުގެ ދަށުން ފިޔަވަޅު އަޅާނެ ކަމަށެވެ.
އެގޮތުބް އެކްސްޕެޓް ސިސްޓަމް އިން ސަސްޕެންޑްކޮށް ސިސްޓަމް މެދުވެރިކޮށް ދެމުން ގެންދާ ހިދުމަތްތައް މެދުކަނޑާލެވޭނެ ކަމަށް މިނިސްޓްރީން ބުންޏެވެ.
ފީ އާއި ޖޫރިމަނާ ނުދައްކާ ކުންފުނިތައް ސިސްޓަމުން ސަސްޕެންޑުކުރާނެ ކަމަށް ހޯމް މިނިސްޓްރީން ބުނެފައިވާއިރު މިދިޔަ ބުދަ ދުވަހާ ހަމައަށް ފީގެ ގޮތުގައި ދައްކަން ޖެހޭ 182 މިލިއަން ރުފިޔާ ހޯދާފައިވާ ކަމަށް ހޯމް މިނިސްޓްރީން ބުނެފައިވެ އެވެ. ބިދޭސީ މުވައްޒަފުންގެ ވޯކް ޕާމިޓާއި ކޯޓާ ފީ ނުދައްކާ އަދި އޭގެ ޖޫރިމަނާ ވެސް ހިމެނޭ ގޮތަށް 100،000ރ. އަށް ވުރެ މަތިން ދައްކަން ޖެހޭ ކުންފުނިތަކުގެ ލިސްޓެއް މިދިޔަ މަހު 24 ގައި ސަރުކާރުން އާންމުކުރި އެވެ.
އެ ލިސްޓުގައި 1026 ކުންފުންޏެއް ހިމެނޭއިރު، އޭގެ ތެރެއިން ދައުލަތަށް މިލިއަނަކަށް ވުރެ ގިނަ ރުފިޔާ ދައްކަން ޖެހޭ ކުންފުނިތަކުގެ އަދަދު 100 އަށް ވުރެ ގިނަ އެވެ.