އަމާޒަކީ ޓެކްނޮލޮޖީގެ ވަސީލަތްތަށް މެދުވެރިކޮށް، ހުރިހާ ދަރިވަރުންނަށް ހަމަހަމަ ފުރުސަތު ލިބދޭ ތަޢުލީމީ ނިޒާމެއް ޤާޢިމްކޮށް، ރާއްޖޭގެ ރަށްތަކަކީ ޓެކްނޮލޮޖީގެ ޒަރިއްޔާއިން ގުޅިލާމެހިފައިވާ ތަޢުލީމީ ތަނަކަށް ހެދުން ކަމަށް ހަޔަ އެޑިއުކޭޝަން މިނިސްޓަރު ޑރ. މަރްޔަމް މާރިޔާ ވިދާޅުވެއްޖެ އެވެ.
ޗައިނާގައިި މިހާރު ކުރިއަށްދާ "ގްލޯބަލް އެޑިޔުކޭޝަން ކޮންފެރެންސް 2024" ފެށުމުގެ ރަސްމިއްޔާތުގައި މިނިސްޓަރު ވިދާޅުވީ އާޓިފިޝަލް އިންޓެލިޖެންސް އޭއައި އާއި އެފަދަ އެހެނިހެން ޓެކްނޮލޮޖީތައް ތަޢުލީމީ ދާއިރާގައި ބޭނުން ކުރަމުން އަންނަ އިރު ސަމާލުވާން ޖެހޭ ބައިވަރު ކަންތައްތަކެއް ހުރި ކަމަށާއި ދަރިވަރުންނާއި މުދައްރިސުން މިފަދަ ވަސީލަތްތަށް ބޭނުންކުރަމުން އަންނަނީ ވިސްނުންތެރިކަމާއި ޒިންމާދާރު ގޮތެއްގައިކަން ކަށަވަރުކުރުމަށްޓަކައި އޭއައި ލިޓްރެސީ ފަދަ މާއްދާތަށް މުޤައްރަރުގައި ހިމަނަންޖެހޭ ކަމަށެވެ.
"އަމާޒަކީ ޓެކްނޮލޮޖީގެ ވަސީލަތްތަށް މެދުވެރިކޮށް، ހުރިހާ ދަރިވަރުންނަށް ހަމަހަމަ ފުރުސަތު ލިބިގެންދާ ތަޢުލީމީ ނިޒާމެއް ޤާޢިމްކޮށް، ދިވެހިރާއްޖޭގެ ރަށްތަކަކީ ޓެކްނޮލޮޖީގެ ޒަރިއްޔާއިން ގުޅި ލާމެހިފައިވާ ތަޢުލީމީ ތަނަކަށް ހެދުން." މާރިއާ ވިދާޅުވި އެވެ.
މިނިސްޓަރު ވިދާޅުވި ގޮތުގައި ތަޢުލީމީ ދާއިރާގައި ޓެކްނޮލޮޖީ ބޭނުންކުރާ އިރު، ޓެކްނޮކޮޖީއާ ގުޅޭ އުސޫލުތަކާއި ޤަވާޢިދުތައް އުފައްދައި، އެ ޤަވާޢިދުތަށް ތަންފީޒުކޮށް، ޓެކްނޮލޮޖީގެ ސަބަބުން އާންމުންނަށް ލިބިދާނެ ގެއްލުންތަކުން ހިމާޔަތް ހޯދައި ދިނުމަކީ ވެސް މުހިއްމު ކަމެއް ކަމަށެވެ.
އަދި ރާއްޖެ އަކީ ކުދިކުދި ރަށްތަކަކުން އުފެދިފައިވާ ޤައުމަކަށްވާ އިރު، މިފަދަ ޤައުމެއްގެ ހުރިހާ ކަންކޮޅުތަކެއްގައި އެއް ފެންވަރެއްގެ ވަސީލަތްތަށް ބޭނުންކޮށް، ތަޢުލީމު ފޯރުކޮށް ދިނުމުގައި ގޮންޖެހުންތަކާއި ކުރިމަތިލާން ޖެހޭ ކަމަށް މިނިސްޓަރު ވިދާޅުވި އެވެ. ނަމަވެސްގޮންޖެހުންތަކުން އަރައިގަނެ، "ސްމާޓް އެޑިޔުކޭޝަން" ނުވަތަ ޓެކްނޮލޮޖީ ބޭނުންކޮށް، ތަޢުލީމު ފޯރުކޮށް ދިނުމުގެ ފުރުޞަތުތަށް ހޯދަން ޖެހޭ ކަމަށް ވިދާޅުވި އެވެ.
މިނިސްޓަރު ވިދާޅުވީ ޤައުމީ ޔުނިވާސިޓީން ހަދާފައިވާ ދިސާރާތަކުން ދައްކާގޮތުގައި، ދުރާލަ އިރާވައިގެން މަސައްކަތްތަށް ކުރިއަށް ގެންދިޔުމާއި، މަތީ ތަޢުލީމުގެ ދާއިރާގައި ޓެކްނޮލޮޖީ ބޭނުންކޮށް، އޮންލައިންކޮށް ތަޢުލީމު ފޯރުކޮށް ދިނުމަކީ ރާއްޖެ އަށް ވަރަށް ބޭނުންވެފައިވާ ކަމެކެވެ.
"ގްލޯބަލް އެޑިޔުކޭޝަން ކޮންފެރެންސް 2024" ގައި މިނިސްޓަރު މާރިއާ ބައިވެރިވެވަޑައިގަންނަވަނީ ބެއިޖިން ނޯމަލް ޔުނިވާސިޓީގެ ދަޢުވަތަކަށެވެ.