ކެނަބިސް ޓްރެފިކްކުރި މައްސަލައަކާ ގުޅިގެން އައްޑޫ ހިތަދޫ މުހައްމަދު އުބާދަތު ހުސައިން ހޯދަން ފުލުހުން ފަސް ވަނަ ފަހަރަށް އިއުލާންކޮށްފި އެވެ.
ހިތަދޫ ހަޒާރުމާގޭ އުބާދަތު، 29، ހޯދަން މިއަދު އަލުން އިއުލާންކުރި އިރު، އެންމެ ފަހުން އޭނަ ހޯދަން އިއުލާންކުރީ މިދިޔަ މަހުގެ 10 ގަ އެވެ. އުބާދަތު ހޯދަން ފުލުުހުން ފުރަތަމަ އިއުލާންކުރީ މެއި މަހުގެ 12 ގަ އެވެ. އޭގެ ފަހުން ޖޫން މަހުގެ 2 ވަނަ ދުވަހު ވެސް އޭނަ ހޯދަން އިއުލާންކުރުމަށް ފަހު ތިން ވަނަ ފަހަރަށް އިއުލާންކުރީ ޖޫން މަހުގެ 22 ގަ އެވެ.
ފުލުހުން ބުނީ އުބާދަތު ހޯދަނީ ކްރިމިނަލް ކޯޓަށް ހުށަހަޅާފައިވާ ކެނެބިސް ޓްރެފިކް ކުރުމުގެ މައްސަލައަކާ ގުޅިގެން ކޯޓަށް ހާޒިރުކުރުމަށް ބޭނުންވެ ހާޒިރުކުރެވިފައި ނުވާތީ، ބަންދުގައި ބަހައްޓައިގެން އުބާދަތު އަންނަ އަންގާރަ ދުވަހުގެ މެންދުރު 12:00 އަށް ކޯޓަށް ހާޒިރުކޮށް ދިނުމަށް ފުލުހުންގެ މައްޗަށް ކޮށްފައިވާ އަމުރަކާ ގުޅިގެން ކަމަށެވެ.
އެހެންވެ އޭނައާ ބެހޭ އެއްވެސް މައުލޫމާތެއް ލިބިފައިވާ މީހަކު ވާނަމަ ފުލުހުންގެ ކަސްޓޯޑިއަލް ނަންބަރު 9991442 އަށް ގުޅައި ހިއްސާކޮށް ދޭން ފުލުހުން އެދިފައިވެ އެވެ.