ރާއްޖެއަށް މިހާރު ކުރަމުންދާ ވިއްސާރައިގައި ގެއްލުންވި ދެ އާއިލާއެއް އަދިވެސް ވަގުތީ ބޯހިޔާވަހިކަމުގައި ތިބިކަމަށް ނޭޝަނަލް ޑިޒާސްޓާ މެނޭޖްމަންޓް އޮތޯރިޓީން ހާމަކޮށްފިއެވެ.
އެ އޮތޯރިޓީގެ ޗީފް އެގްޒެކެޓިވް ހިސާން ހަސަން ދައުލަތުގެ މީޑިއާގެ ޕްރޮގްރާމެއްގައި ރޭ ވާހަކަ ދައްކަވަމުން ވިދާޅުވީ، ވިއްސާރައިގެ ސަބަބުން ދިރިނޫޅެވޭ ވަރަށް ގެއްލުންވުމުން 5 ގޭބިސީއަކަށް ވަގުތީގޮތުން އެހީތެރިކަން ފޯރުކޮށްދީފައިވާ ކަމަށެވެ.
ހިސާން ވިދާޅުވީ މިހާރުވެސް 2 ގޭބިސީއެއްގެ 10 މީހަކު ވަގުތީ ބޯހިޔަވަހިކަމުގައި ތިބިކަމަށެވެ. އަދި އާއްމު ހާލަަތަކަށް އައުމުން އެފަރާތްތައް އާއްމު ދިރިއުޅުމަށް ރުޖޫއަކުރެވޭނެ ކަމަށެވެ.
ވިއްސާރައިގައި ލިބުނު ގެއްލުން ދެނެގަތުމަށް ހެދި ރެޕިޑް އެސެސްމެންޓުން ބައެއް ގޭބީސީތަކުގައި ދިރިނޫޅެވޭ ވަރަށް ހާލަތު ގޯސްވެފައިވާކަން ފާހަގަކުރެވުނު ކަންވެސް ހިސާން ފާހަގަ ކުރެއްވިއެވެ.
ރާއްޖޭގެ އެކި ކަންކޮޅުތަކަށް ކުރި ވިއްސާރައިގައި ފެންބޮޑުވެ ގެތަކަށް ފެންވަނުމުގެ ހާދިސާތައް ހިނގާފައިވެއެވެ. މާލޭގައިވެސް ބައެއް ގެތަކަށް ފެންވަދެފައިވެއެވެ.