އަބުރުކަތިލާ ޒާތީ ދިރިއުޅުމުގެ ކަންކަމާބެހި ގަނާކުރުމުގެ ބަދަލުގައި ޤާނޫނީއިމުގެ ތެރެއިން ކަންކަން ބެލުމަށް ކުރީގެ ފޮރިން މިނިސްޓަރު އަބްދުﷲ ޝާހިދު ގޮވާލައްވައިފިއެވެ.
ޝާހިދު މިފަދައިން ވިދާޅުވީ އޭނާގެ ތިން ދަރިންވެސް ހުޅުމާލެއިން އަގުބޮޑެތި އެޕާޓްމަންޓްތައް ގަނެފައި ހުރި ކަމަށްބުނެ ދިޔަރެސް ނޫހުގައި ލިޔެފައިވާ ލިޔުމަކާ ގުޅިގެންނެވެ.
ޝާހިދު ވިދާޅުވީ ދިޔަރެސް ނޫހުގައި އޭނާއާއި އާއިލާގެ އަބުރުކަތިލުމުގެ މަގުސަދުގައި ވާހަކަތަކެއް ލިޔެފައިވާ ކަމަށެވެ. އެގޮތުން ދަރިފުޅު މޫސާ ޔަމީން ޝާހިދު ރެއިންކުރެސްޓް އިން ގަނެފައިވާ އެޕާރޓްމެންޓް ގަނެފައިވަނީ ބޭންކް އިން ލޯނެއް ނަގައިގެން ކަމަށް ޝާހިދު ވިދާޅުވިއެވެ. އަދި މިހާރުވެސް ގެންދަނީ ލޯނު އަނބުރާ ދައްކަމުން ކަމަށާއި ދިޔަރެސްގައި އެބުނާ އެޕާޓްމެންޓްތައް ގަނެފައިވަނީ ސަރުކާރުގެ ވަޒީރުކަމުގައި ހުރި މިދިޔަ 5 އަހަރުގެ ތެރޭގައި ނޫންކަމަށްވެސް ޝާހިދު ވިދާޅުވިއެވެ.
"އަޅުގަނޑު މާލޭގައި 10 ބުރީގެ އެޕާރޓްމެންޓް ބިލްޑިންގް އެއް އިމާރާތްކޮށް ކުއްޔަށްދިނުމުގެ ވިޔަފާރި ކުރަމުން އަންނަތާ އެތަށް ޒަމާނެއްވެއްޖެއެވެ. الله ގެ ހެޔޮ ރަޙްމަތްފުޅުން އަޅުގަނޑުގެ އާއިލާއަށް ބޭނުންވާކަންތައްތައް ޤާނޫނުގެ އިމުގެތެރޭގައި ކުރެވޭވަރުގެ ތަނަވަސްކަންވަނީ މިންވަރު ކުރައްވާފައެވެ." ޝާހިދު ވިދާޅުވެފައިވެއެވެ.
ޝާހިދު ވިދާޅުވީ އޭނާއާއި އޭނާގެ ދަރިންނަކީވެސް ދިވެހި ރައްޔިތުންނަށްވާތީ މުދާ ހޯދުމާއި މުދާ ގެންގުޅުމުގެ ހައްޤު ޤާނޫނުއަސާސީ ގެ 40 ވަނަ މާއްދާއިން ކަށަވަރު ކޮށްދޭ ކަމަށެވެ.
މިކަމާމެދު ސުވާލުކުރައްވާ ފަރާތްތަކުން، އަބުރުކަތިލާ ޒާތީ ދިރިއުޅުމުގެ ކަންކަމާބެހި ގަނާކުރުމުގެ ބަދަލުގައި ޤާނޫނީއިމުގެ ތެރޭގައި އެންޓި ކޮރަޕްޝަން ކޮމިޝަނަށް ހުށަހަޅުއްވައި އެކޮމިޝަނުން މިކަންކަން ބެއްލެވުމަށް މަރުހަބާ ކިޔާ ކަމަށް ޝާހިދު ވިދާޅުވިއެވެ.