އަހަރަކު ދެ ފަހަރު ކައުންސިލްތަކުގެ ބައި-އިލެކްޝަންތައް ބާއްވަންޖެހޭގޮތަށް ލޯކަލް ކައުންސިލްތަކުގެ އިންތިޚާބުގެ ޤާނޫނަށް އަދި ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ޤާނޫނަށް ގެނައި އިސްލާހު، ރައީސް ޑރ. މުހައްމަދު މުއިއްޒު ތަސްދީގު ކުރައްވައިފިއެވެ.
ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ޤާނޫނަށާއި ލޯކަލް ކައުންސިލްތަކުގެ އިންތިޚާބުގެ ޤާނޫނަށް ސަރުކާރުގެ ފަރާތުން ހުށަހެޅި އިސްލާހުތައް ރައްޔިތުންގެ މަޖިލީހުން ފާސްކޮށްފައިވަނީ އޮގަސްޓް 7 ވަނަ ދުވަހުއެވެ.
ލޯކަލް ކައުންސިލްތަކުގެ އިންތިހާބުގެ ޤާނޫނަށް ގެނެސްފައިވާ މައިގަނޑު އިސްލާހުތަކުގެ ތެރޭގައި، ލޯކަލް ކައުންސިލްތަކުގެ ހުސްވާ ގޮނޑިއަށް މެންބަރުން އިންތިހާބުކުރަން ބާއްވާ ބައިއިލެކްޝަންތައް ބާއްވަންވާނީ އަހަރަކު ދެފަހަރު ކަމުގައި ކަނޑައަޅާފައިވެއެވެ. އަދި އެފަދައިން އަހަރަކު ދެފަހަރު ބައިއިލެކްޝަން ބާއްވާއިރު، ދެ ބައިއިލެކްޝަންގެ ދެމެދުގައި 183 ދުވަހަށްވުރެ ދިގު އަދި 120 ދުވަހަށްވުރެ ކުރު މުއްދަތެއް ފާއިތުވެގެންނުވާނެ ކަމުގައި ކަނޑައަޅާފައިވެއެވެ.
ލާމަރުކަޒީ ގާނޫނަށް ގެނެސްފައިވާ އިސްލާހުގައި ބުނެފައިވަނީ، އަތޮޅު، ރަށު ކައުންސިލް ރައީސް އަދި މެންބަރުންގެ ގޮނޑި ހުސްވާކަން އަންގާތާ 183 ދުވަހުގެ ތެރޭގައި ހުސްވެފައިވާ ގޮނޑިއަށް މެންބަރަކު އިންތިހާބު ކުރަންވާނެ ކަމަށެވެ. އަދި މަގާމު ހުސްވިއިރު ކައުންސިލް އުމުރުގެ ބާކީ އޮތީ 365 ދުވަސް ނުވަތަ އެއަށްވުރެ ކުރު މުއްދަތެއްނަމަ އެ ހުސްވި މަގާމަށް މެންބަރަކު އިންތިހާބު ކުރުން ލާޒިމު ނޫން ކަމަށްވެސް އިސްލާހުގައި ބުނެފައިވެއެވެ. މި ޤާނޫނަށް ގެނެސްފައިވާ އިސްލާހުގައި އިތުރަށް ބުނެފައިވަނީ ކައުންސިލް މެންބަރެއްގެ މަގާމު ހުސްވެގެން ބައްދަލުވުމެއް ބޭއްވުމަށް ބޭނުންވާ ޤާނޫނީ އަދަދު ހަމަވާ މިންވަރަށް މެންބަރުން ނެތްނަމަ، 60 ދުވަހުގެ ތެރޭގައި މެންބަރުން އިންތިހާބު ކުރަންވާނެ ކަމަށެވެ.