މީގެ 10 އަހަރު ކުރިން ރިލީޒްކުރި އާލިއާ ބަޓްގެ ފިލްމު "ހައިވޭ" ގެ ބަތަލާއަކަށް އެންމެ ފުރަތަމަ ނަގަން ބޭނުންވީ އައިޝްވާރިއާ ރާއީ ކަމަށް ޑައިރެކްޓަުރި އިމްތިއާޒް އަލީ ބުނެފި އެވެ.
މިޑް-ޑޭ އަށް ދިން އިންޓަވިއުއެއްގައި އޭނަ ބުނީ 2014 ގައި ރިލީޒްކުރި ފިލްމުގެ ބަތަލާއަކަށް ކުރިން ނަގަން ބޭނުންވީ އުމުރުން 30 އަހަރުން މަތީގެ ބަތަލާއެއް ކަމަށެވެ.
"އެހެންވެ ފުރަތަމަ ޗޮއިސްއަކަށްވީ އައިޝްވާރިއާ." ޖަބް ވީ މެޓް އާއި ލަވް އާޖް ކަލް އަދި ރޮކްސްޓާ ފަދަ މަގުބޫލު ފިލްމުތައް ގެނެސްދިން ޑައިރެކްޓަރު ބުންޏެވެ.
އޭނަ ބުނި ގޮތުގައި ފަހުން އެ ހިޔާލު ބަދަލުވެ، އާލިއާ އަށް ފިލްމު ހުށަހެޅީ ފިލްމެއްގެ ސްކްރީނިންއެއްގެ ތެރެއިން ދިމާވެ ދެކުނު ވާހަކަތަކެއްގެ ތެރެއިންނެވެ. އެގޮތުން އާލިއާއާ އެކީ ހޭދަކުރެވުނު ވަގުތުކޮޅުގެ ތެރޭގައި "ހައިވޭ" ގެ ބަތަލާގެ ރޯލަށް އޭނަ ވަރަށް ފިޓްވާކަމަަށް ގަބޫލު ކުރެވުނު ކަމަށް އިމްތިއާޒް ބުންޏެވެ.
"އެހެންވެ އަހަރެން ފަހުން އާލިއާއާ ސްކްރިޕްޓް ވެސް ހަވާލު ކުރިން." އޭނަ ބުންޏެވެ.
ރޯޑް ޑްރާމާއެއްގެ ގޮތުގައި ގެނެސްދިން "ހައިވޭ" ގައި އާލިއާ ކުޅުނީ ވަރަށް ޑިގްލެމަރަސް ރޯލެކެވެ. އަދި މިއީ އޭނަގެ ދެވަނަ ފިލްމެވެ. އާލިއާ ބޮލީވުޑަށް ނުކުތީ ވަރަށް ގްލެމަރަސް ރޯލެއް ކުޅުނު ޑައިރެކްޓަރު ކަރަން ޖޯހަރްގެ 2012 ގެ "ސްޓޫޑެންޓް އޮފް ދި އިޔާ" އިންނެވެ.
ރަންދީޕް ހޫޑާ ބަތަލުގެ ރޯލުނު "ހައިވޭ" ގައި އާލިއާ ދެއްކި މޮޅު އެކްޓިންގެ ސަބަބުން އޭނަ ފިލްމުފެއާގެ މޮޅު ބަތަލާގެ ކްރިޓިކްސް އެވޯޑް ވެސް ލިބުނެވެ.