ސިޔާސީ މައިދާނުން އެމަނިކުފާނު އެކަހެރި ނުކުރެވޭނެ ކަމަށް ކުރީގެ ރައީސް އަބްދުﷲ ޔާމީން ވިދާޅުވެއްޖެ އެވެ.
ޔާމީން މިހެން ވިދާޅުވެފައިމިވަނީ އެމަނިކުފާނު މިހާރު ހުންނެވީ ސިޔާސީ މައިދާނުން އެކަހެރިވެފައި ކަމަށް ޓޫރިޒަމް މިނިސްޓަރު އިބްރާހިމް ފައިސަލް ވިދާޅުވެފައިވާ ދަނޑިވަޅެއްގަ އެވެ.
ޕީއެންއެފް އިން މިރޭ ބޭއްވި ޖަލްސާގައި ވާހަކަފުޅުދައްކަވަމުން ޔާމީން ވިދާޅުވީ ފައިސަލް ކިތަންމެ އަޑަށް ބާރުލާފައި ވިދާޅުވިޔަސް އެމަނިކުފާނު ހުންނެވީ ސިޔާސީ މައިދާނުން އެކަހެރިވެގެން ނޫން ކަމަށާއި އެއީ ކުރެވޭނެ ކަމެއް ވެސް ނޫން ކަމަށެވެ.
"އަޅުގަނޑު ސިޔާސީ މައިދާނުން އެކަހެރިވެގެނެއް ނޫން މިހުރީ، އެކަހެރި ނުވެސް ކުރެވޭނެ. އަޅުގަނޑު މިހުރީ ސިޔާސީ މައިދާނުގައި،" ޔާމީން ވިދާޅުވި އެވެ.
ޔާމީން ވިދާޅުވީ ސަރުކާރުގައި ތިއްބަވާ ބޭފުޅުން އެގޮތަށް ވާހަކަދެއްކެވި ނަމަވެސް އެއީ އެ ބޭފުޅުންނަށް "ހީފުޅުވާ" ގޮތް ކަމަށާއި އޭގެއިން ބޭފުޅަކު ސަރުކާރުން ވަކިވެ ޕާޓީއއް ހަދަން ނިކުތަސް 1،000 މީހުން ވެސް އޭގެއިން ބޭފުޅެއްގެ ފަހަތަށް ނާރާނެ ކަމަށެވެ.
"އަޅުގަނޑު ހަމަ ގޮންޖަހާލާފައި މި ދަންނަވަނީ، އެތަނުން ބޭފުޅަކު ސަރުކާރުން ވަކިވާ ހިސާބުން ނިކުމެވަޑައިގެން ޕާޓީއެއް ހައްދަވާ، 3،000 މީހުން ކީއްކުރަންތޯ 1،000 މީހުންވެސް އެއިން މީހެއްގެ ފަހަތަށް ނާރާނެ،" ޔާމީން ވިދާޅުވި އެވެ.
މީގެއިތުރުން ޔާމީން ވަނީ ރައްޔިތުންގެ މަޖިލީހުގައި ތިބި ސަރުކާރަށް ތާއީދުކުރާ މެމްބަރުންނަށް ރައްޔިތުންނަށް ދަތިވާ ކަންކަމުގައި ބަސް ބުނަން ނުކުރޭ ކަމަށާއި އޭގެ ބަދަލުގައި އިދިކޮޅު އެމްޑީޕީގެ މެމްބަރުން އެފަދަ ކަންކަމުގައި ވާހަކަ ދައްކަމުންދާ މަންޒަރު ފެންނަމުންދާ ކަމަށްވެސް ވިދާޅުވެފަ އެވެ.