އަމިއްލަ ފަރާތްތަކުން ފިހާރަކުގައި ވިއްކާ ކާބޯތަކެތި ކަނޑައަޅާފައިވާ މިންގަނޑަށް ފެތޭތޯ ބަލަމުންދާނެ ކަމަށް މޯލްޑިވްސް ފުޑް އެންޑް ޑްރަގް އޮތޯރިޓީ (އެމްއެފްޑީއޭ) އިން ބުނެފި އެވެ.
ރައްޔިތުންގެ މަޖިލީހުން ފާސްކޮށްފައިވާ ކާބޯތަކެތީގެ ގާނޫނަށް އަންނަ ހުކުރު ދުވަހުން ފެށިގެން އަމަލުކުރަން ފަށާނެ އެވެ.
އެހެންވެ މިކަމާ ގުޅޭ ގޮތުން ދައުލަތުގެ މީޑިއާ، ޕީއެސްއެމްގައި އެމްއެފްޑީއޭގެ ފުޑް ކޮލިޓީ އެޝުއަރެންސް ކޯޑިނޭޓަރު ޚާލިސާ މުޙައްމަދު ވިދާޅުވީ ގާނޫނަށް އަމަލުކުރަން ފެށުމާ އެކު، ކާބޯތަކެތީގެ ރައްކާތެރިކަން ކަށަވަރު ކުރުމުގެ މަސައްކަތްތައް ކުރަމުން ދާނީ އެމްއެފްޑީއޭއިން ކަމަށެވެ. އެ ގޮތުން ކާބޯތަކެތީގެ ގިންތިތަކެއް ކަނޑައަޅައި، ހަ މަސް ދުވަހުގެ ތެރޭގައި ކާބޯތަކެތީގެ ވިޔަފާރިކުރާ ތަންތަނުން އެމްއެފްޑީއޭގައި ރަޖިސްޓްރީ ވެސް ކުރަން ޖެހޭނެ ކަމަށް ވިދާޅުވި އެވެ.
ޚާލިސާ ވިދާޅުވީ ކާބޯތަކެތީގެ ގާނޫނުގެ ދަށުން ފިހާރަތަކުގައި ކާބޯތަކެތި ބެހެއްޓޭނެ މިންގަނޑުތައް ކަނޑައަޅައި، އެއާ އެއްގޮތަށް އަމަލު ކުރަމުންދޭތޯ އެމްއެފްޑީއޭ އިން ބަލަމުން ދާނެ އެވެ. އަދި ކުރިން އެންގުމަކާ ނުލައި، ކާތަކެތި ތައްޔާރުކުރާ ގެތަކަށް ގޮސް ވެސް އެ މަސައްކަތް ކުރިއަށްދާ ގޮތް ބެލުމުގެ ބާރު ލިބިގެން ގާނޫނުން އެމްއެފްޑީއޭ އަށް ދީފަިއވެ އެވެ.
"އެހެންވެ އެމްއެފްޑީއޭ އާއި ހެލްތު މިނިސްޓްރީގެ ވެސް ވަރަށް ބޮޑު އިލްތިމާސެއް އާންމު ފަރުދުން ވެސް އަދި ކާބޯތަކެތީގެ ވިޔަފާރި ކުރާ ފަރާތްތަކުން ވެސް އަޅުގަނޑުމެންގެ މުޖުތަމައުގެ ރައްކާތެރި ކަމަށްޓަކައި ކުރާ މަސައްކަތެއް ކަމުގައި ބަލައިގެން، އަޅުގަނޑުމެންނާ އެއްކޮށް މި ކަމުގައި އެ ބޭފުޅުންގެ އެއްބާރުލުން އަޅުގަނޑުމެންނަށް ވަރަށް ބޮޑަށް ބޭނުންވާނެ." އޭނަ ވިދާޅުވިއެވެ.
ކާބޯތަކެތީގެ ގާނޫނުގެ ދަށުން ކަނޑައެޅިފައިވާ މިންގަނޑުތަކާ ޚިލާފުވާ ތަންތަން ޖޫރިމަނާކޮށް، ލައިސަންސް ހިފަހައްޓައި، އަދި އެ ތަންތަނުގެ މައުލޫމާތު އާންމު ކުރުމުގެ އިޚުތިޔާރު ވެސް ގާނޫނުން އެމްއެފްޑީއޭ އަށް ލިބި ދެ އެވެ.