މާލޭ ރައްޔިތުންނަށް ގޯތި ލިބެންޖެހޭ ކަމަށް ޕީއެންސީގެ މެންބަރުން ގަބޫލުކުރާ ކަމަށް ހެންވޭރު އުތުރު ދާއިރާގެ މެންބަރު އަހްމަދު އައިފާން ވިދާޅުވެއްޖެއެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި އާބަން ޑިވެލޮޕްމަންޓްގެ ބިލާ ގުޅޭގޮތުން ވާހަކަ ދައްކަވަމުން މެންބަރު އައިފާން ވަނީ މަޖިލީހުގައި ވާހަކަ ދެއްކި ބައެއް މެންބަރުން، މާލޭގެ ރައްޔިތުންނަށް ގޯތި ދިނުމާ ދެކޮޅަށް ވާހަކަ ދެއްކުމުން އެކަމަށް ރައްދު ދެއްވާފައެވެ.
އެގޮތުން އައިފާން ވިދާލުވީ މާލޭގެ ރައްޔިތުންނަށް ގޯތި ލިބެންޖެހޭ ކަމަށާއި މާލޭގެ ރައްޔިތުންނަށް ގޯތި ނުލިބޭތާ 40 ވަރަކަށް އަހަރުވެފައިވާ ކަމަށެވެ. މިދިޔަ ސަރުކާރުން މާލޭގެ ރައްޔިތުންނަށް ފަޅުން ދީފައިވާ ގޯތިތައް، އެ ފަޅުތައް ހިއްކުމަށްފަހު މި ސަރުކާރުން ދޭނެ ކަމަށްވެސް އައިފާން ވިދާޅުވިއެވެ.
"ޕީއެންސީ ހުރިހާ މެންބަރުން ގަބޫލުކުރޭ މާލޭގެ ރައްޔިތުންނަށް ގޯތި ލިބެންޖެހޭ ކަމަށް، އެކަމަކު ގޯސްތައް ހަދާފަހުރިއްޔާ އެވާހަކަ ދައްކާނެ. އޭގެ މާނައަކީ މާލޭގެ ރައްޔިތުންނަށް ގޯތި ދޭން ނުޖެހޭ ވާހަކައެއް ނޫން." އައިފާން ވިދާޅުވިއެވެ.
އާބަން ޑިވެލޮޕްމަންޓްގެ ބިލަށް ވާހަކަ ދައްކަވަމުން މެންބަރު އައިފާން ވިދާޅުވީ އާބަން ޑިވެލޮޕްމަންޓްގެ ބިލެއް އޮތުމުން އިންތިހާބުތަކާ ދިމާކޮށް ރަށްރަށަށްގޮސް އެއާޕޯޓްތައް އެޅުމަށް ވެރިން ވައުދުވަމުންދިޔަ ވައުދުތައް ހުއްޓޭނެ ކަމަށެވެ. އަދި ތަރައްގީ ކުރެވޭ ވަކިތަންތަން ތަރައްގީ ކުރުމަށް މިބިލުގެ ތެރެއިން ކަނޑައެޅޭނެކަން ފާހަގަ ކުރެއްވިއެވެ.
މިސަރުކާރުން ދައްކަނީ ރާއްޖެއަށް ދިމާވެފައިވާ މައްސަލަތަކަށް ހައްލު ހޯދާނެގޮތުގެ ވާހަކަކަން ފާހަގަކޮށް މެންބަރު އައިފާން ވިދާޅުވީ ސަރުކާރުގެ ފަރާތުން ހުށަހަޅާފައިވާ އާބަން ޑިވެލޮޕްމަންޓްގެ ބިލަކީ ރާއްޖޭގެ ތަރައްގީއަށް އަދި މުސްތަގުބަލަށް ކޮންމެހެން މުހިންމު ބިލެއް ކަމަށެވެ.