އިންޑިއާގެ ކުރީގެ ރަސްކަލެއް ކަމަށްވާ ޗަތުރަޕަތީ ސަނބާޖީ މަޖާރާޖްގެ ރޯލު، އެކްޓަރު ވިކީ ކޯޝަލް ކުޅެފައިވާ ތާރީހީ ފިލްމު "ޗާވާ" ގެ ޓީޒާ ޓްރެއިލާ މިއަދު ދައްކާލައި ފިލްމު ސިނަމާތަކަށް ގެންނަ ތާރީހު ވެސް އިިއުލާންކޮށްފި އެވެ.
މި އަހަރުގެ އެންމެ އުންމީދީ ފިލްމުތަކުގެ ތެރޭގައި ހިމެނޭ މި ފިލްމު ޑިސެމްބަރު 6 އަށް ތާވަލުކޮށްފައިވާ އިރު، މިއީ ޕްރޮޑިއުސަރު ދިނޭޝް ވިޖަންގެ މެޑޮކް ފިލްމްސް އަށް ލަކްޝްމަން އުޓޭކަރް ޑައިރެކްޓްކޮށްފައިވާ ފިލްމެކެވެ. އޭނަ އަކީ "ލުކާ ޗުއްޕީ" އާއި "މިމީ" އަދި "ޒަރަ ހަޓް ކޭ، ޒަރަ ބަޗްކޭ" ވެސް ގެނެސްދިން ޑައިރެކްޓަރެވެ.
މެޑޮކް އިން ޑިސެމްބަރުގައި "ޗާވާ" ގެނެސްދޭން ނިންމި އިރު، މި މަހުގެ 15 ގައި ރިލީޒްކުރި އެ ސްޓޫޑިއޯގެ ހޮރޯ-ކޮމެޑީ "އިސްތިރީ 2" އަންނަނީ ބޮކްސް އޮފީހުގައި ރަސްކަން ކުރަމުންނެވެ. އަދި ޖޫން މަހު ރިލީޒްކުރި މެޑޮކްގެ "މުންޖިއާ" އަކީ ވެސް މި އަހަރުގެ އެންމެ ބޮޑު ސަޕްރައިޒިން ހިޓެވެ.
ނެޝަނަލް އެވޯޑް ހޯދާފައިވާ އެކްޓަރު ވިކީ ތާރީހީ ވަރުގަދަ ޝަހުސިއްޔަތެއްގެ ރޯލުން "ޗާވާ" އިން ބެލުންތެރިންނާ ބައްދަލުކުރާ އިރު، އޭނަގެ އެންމެ ފަހުގެ ފިލްމަކީ މިދިޔަ މަހު ރިލީޒްކޮށް، ބެލުންތެރިންގެ ބޮޑު ތަރުހީބެއް ލިބުނު ރޮމޭންޓިކް ކޮމެޑީ "ބޭޑް ނިއުސް" އެވެ.
މަޝްހޫރު ބަތަލާ ކެޓްރީނާ ކައިފްގެ ފިރިމީހާ، ވިކީ "ޗާވާ" ކުޅެން ހަށިގަނޑަށާއި އޭނަގެ ލުކަށް ބޮޑު ބަދަލެއް ވެސް ގެނެސްފައިވާ އިރު، މި ފިލްމުގެ ކާސްޓްގައި ރަޝްމިކާ މަންދަނާ، އަކްޝޭ ކަންނާ، އަޝުތޯޝް ރާނާ، ދިވްޔާ ދައްތާ އަދި ނީލް ބޫޕަލަމް ހިމެނެ އެވެ.