ކުރީ ސަރުކާރުން މާލޭގެ ރައްޔިތުންނަށް ގޯތި ދީފައިވަނީ ގާނޫނާ ހިލާފަށްނަމަ އެ ގޯތިތައް އަތުލުމަށް ވެލިދޫ ދާއިރާގެ މެންބަރު މުހައްމަދު އައްބާސް ގޮވާލައްވައިފިއެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި އާބަން ޑިވެލޮޕްމަންޓްގެ ބިލާ ގުޅޭގޮތުން ކުރިއަށް ގެންދިޔަ ބހުސްގައި ވާހަކަ ދައްކަވަމުން މެންބަރު އައްބާސް ވިދާޅުވީ ފަޅުން ގޯތި ދެވޭނެ އެއްވެސް ޤާނޫނެއް ނެތް ކަމަށެވެ.
އޭނާގެ ކުރިން ވާހަކަ ދެއްކި މެންބަރަކުވެސް ދެއްކި ވާހަކައާ ހަވާލާދީ އައްބާސް ވަނީ ގާނޫނާ ހިލާފަށް ދީފައިވާ ގޯތިތައް އަތުލަން ގޮވާލާފައެވެ.
"ކީއްކުރަންތޯ އެގޯތިތައް ދީފައި ހުރީ ރަނގަޅަށް ކަމަށް ހައްދަވައިގެން އެ ހުރިހާ ގޯތިތަކެއް ދޭން މިއުޅެނީ" އައްބާސް ވިދާޅުވިއެވެ.
އައްބާސް ވިދާޅުވީ ވަކި ބަޔަކަށް ހިލޭ ގޯތި ދިނުމާ ދެކޮޅު ކަމަށާއި އެތަންތަން ހިއްކަނީ މުޅި ރައްޔިތުންގެ ޓެކްސް ފައިސާއިން ކަމަށެވެ. މާލޭ ރައްޔިތުންނަށް ގޯތި ދިނުމަށް ހިއްކަނީ މާލޭގެ ބައެއް ނޫން ކަމަށާއި ހިއްކަމުންދަނީ ގުޅިފައިވާ ފަޅުތައް ކަމަށްވެސް އައްބާސް ވިދާޅުވިއެވެ.