ދުނިޔޭގެ އެކި ހިސާބުތަކުގައި މިހާރު އެމްޕޮކްސް ނުވަތަ މަކުނުވިދުރި ބާރަށް ފެތެރުމުންދާތީ އަތުވެދާނެ ހާލަތަކަށް ބަލައި ރާއްޖޭގައި ވެސް އެ ބައްޔަށް ޓެސްޓް ކުރަން ވާން ޖެހޭ ތައްޔާރީތައް ވަމުން އަންނަ ކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ބުނެފި އެވެ.
އެތަނުން ނެރުނު ބަޔާނެއްގައި ބުނީ ބަލި ފެތުރެމުންދާ ސްޓްރެއިން އާންމު ގޮތެއްގައި ފެތުރެނީ ޖިންސީ ގުޅުމުން ކަމަށް ވިޔަސް އެހެނިހެން ގޮތްގޮތުން ވެސް ބަލި ފެތުރެމުގެ ފުރުސަތު އެބައޮތް ކަމަށެވެ.
އޭގެ ތެރޭގައި ހިމެނޭ ކަންކަމަކީ:
* ބަލި ޖެހިފައިވާ މީހެއްގެ ހަމުގައި ހުންނަ ބިހިތަކުގައި ނުވަތަ އެެއިން ނުކުންނަ ދިޔައިގައި ޖެހުމުން
* ބަލި މީހާ ބޭނުންކުރާ ހެދުން، ތުވާލި އަދި ބެޑްޝީޓް ފަދަ ތަކެތީގައި ޖެހުމުން
* ނޭވާލާ ނިޒާމުގެ ޒަރިއްޔާއިން
* ބަލި ޖެހިފައިވާ ޖަނަވާރަކާ ކޮންޓެކްޓްވުމުން
އެޗްޕީއޭ އިން ބުނީ ރާއްޖެ އަށް އެމްޕޮކްސް ބަލި އައުމުގެ ފުރުސަތު އޮތް މިންވަރު ދެނެގަތުމާއި ބަލި ފެތުރުން ކޮންޓްރޯލް ކުރުމަށާއި ބައްޔަށް ޓެސްޓް ކުރުމާއި ފަރުވާ ދިނުމަށް ވާން ޖެހޭ ތައްޔާރީތައް އަންނަނީ ވަމުން ކަމަށެވެ. އަދި ބައްޔަށް ސިއްހީ ހިދުމަތްތެރިން އަހުލުވެރި ކުރުމާއި ސަވެއިލަންސް ހަރުދަނާ ކުރުމުގެ މަސައްކަތް ވެސް ކުރަމުން އަންނަ ކަމަށް ބުންޏެވެ.
އެމްޕޮކްސް އަކީ ހާއްސަ ފަރުވާއެއް ހޯދިފައި އަދި ނެތް ބައްޔެކެވެ. އެހެންވެ މިހާރު އަލާމާތްތަކަށް ބަލައި ބަލި މީހާ އަށް ފޯރުކޮށް ދެނީ ސަޕޯޓިވް ފަރުވާއެކެވެ.
އެޗްޕީއޭ އިން ބުނީ އެމްޕޮކްސް ބަލި ފެތުރެން ފެށުމާ އެކު ބަލީގެ ހާލަތު މޮނިޓަ ވެސް ކުރަމުން އަންނަ ކަމަށެވެ.
މި ބަލި މިހާރު އެންމެ ބޮޑަށް ފެތުރެމުން ދަނީ އެފްރިކާގެ ގައުމުތަކުގަ އެވެ. އެގޮތުން އެ ބައްރުގެ 13 ގައުމަކުން ބަލި ފެނުމާ ގުޅިގެން ޑަބްލިއުއެޗްއޯ އިން އޮތީ ކުއްލި ނުރައްލަތުގެ ހާލަތު ވެސް އިއުލާންކޮށްފަ އެވެ.