ޓޫރިޒަމް ދާއިރާގައި މަސައްކަތްކުރާ އަންހެނުންގެ ނިސްބަތުން ކަމަށާއި ރާއްޖޭގެ ރިސޯޓްތަކުގައި އަންހެނުންނަށް ފަހި މާހައުލެއް ނެތް ކަމަށް ފަސްޓްލޭޑީ ސާޖިދާ މުހައްމަދު ވިދާޅުވެއްޖެ އެވެ.
ޓޫރިޒަމް ދާއިރާގައި މަސައްކަތް ކުރާ އަންހެނުންނަށް ހާއްސަކޮށްގެން މިއަދު ހޮޓެލް ޖެންގައި ފެށި "މޯލްޑިވްސް ޓްރެވަލް ކޮންފަރެންސް: ވިމެންސް އެޑިޝަން 2024" ހުޅުވުމުގެ ރަސްމިއްޔާތުގައި އެ ކަމަނާ ވިދާޅުވީ ބައެއް ރިސޯޓްތަކުގައި އަންހެނުންނަށް ފަހި މާހައުލެއް ނެތް ކަމަށެވެ. އޭގެ ސަބަބުތަކުގެ ތެރޭގައި އަންހެނުންނާ ގުޅިފައިވާ އިޖުތިމާއީ ނިކަމެތިކަމާއި، މެނޭޖްމަންޓް މަގާމުތަކުގައި އަންހެނުންނަށް ހުރި ފުރުސަތުތައް ހަނިވާ ގޮތަށް ކަންކަން ދެމިއޮތުމާއި، ނިޒާމީ ގޮތުން ދިމާވާ މައްސަލަތައް ހިމެނޭ ކަމަށް ސާޖިދާ ވިދާޅުވި އެވެ.
އެ ކަމަނާ ވަނީ އަންހެނުންނަށް މަސައްކަތުގެ މާހައުލުގައި ކުރިމަތިވާ ބައެއް ގޮންޖެހުންތައް ޙިއްޞާކުރައްވައިފަ އެވެ. އެގޮތުން ވިހެއުމުގެ ޗުއްޓީ އާއި އެފަދަ ބޭނުންތައް ދެނެގަނެވޭނެ މަސައްކަތުގެ މާހައުލެއް ޤާއިމުކުރުމުގެ މުހިންމުކަން ބޮޑު ކަމަށް ވިދާޅުވި އެވެ.
ސާޖިދާ ވިދާޅުވީ ވަޒީފާ ދިނުމުގައި އަންހެނަކަށްވީތި ތަފާތުކުރުން ގެންގުޅުމަކީ އެއްވެސް ވަރަކަށް ޤަބޫލު ކުރެވޭނެ ކަމެއް ނޫން ކަމަށާއި އަދި އެއީ މިންތީގެ ހަމަހަމަކަން ޤާއިމުކުރުމަށް އެޅޭ ހުރަހެއް ކަމަށެވެ. އެކަމަނާ ވިދާޅުވީ ޙަޤީޤީ ބަދަލެއް ގެނެއުމަށް ހަރުދަނާ ސިޔާސަތުތަކެއް ބިނާކުރުމަށް، ޓޫރިޒަމް ދާއިރާގައި ހަރަކާތްތެރިވާ އަންހެނުންގެ އަޑު އަހައި، މަސައްކަތުގެ މާހައުލުގައި އެކަނބަލުންނަށް ހުރި ގޮންޖެހުންތައް ދެނެގަތުން މުހިއްމު ކަމަށެވެ.
"މޯލްޑިވްސް ޓްރެވަލް ކޮންފަރެންސް: ވިމެންސް އެޑިޝަން 2024" އަކީ މޯލްޑިވްސް އެސޯސިއޭޝަން އޮފް ޓްރެވަލް އެޖެންޓްސް އެންޑް ޓުއާ އޮޕަރޭޓާސް (މަޓާޓޯ) އިން އިިންތިޒާމުކުރި ކޮންފަރެންސެކެވެ.