އެކްޓަރު ރަވީ ފާރޫގާއި އަލީ ޝިފާއު (ޗިއްޕެ) ގުޅިގެން ޑައިރެކްޓްކުރާ ޑާކް ރެއިން އެންޓަޓައިންމަންޓްގެ އާ ފިލްމު "ޕްރޮޖެކްޓް 37" ގެ ޝޫޓިން މިއަދު ފަށައިފި އެވެ.
ރަސްމީކޮށް އަދި މީގެ ނަން ފައިނަލް ނުކުރާތީ ފިލްމުގެ ވާކިން ޓައިޓްލްއަކަށް "ޕްރޮޖެކްޓް 37" ބޭނުން ކުރަނީ މިއީ ޑާކް ރެއިންގެ 37 އުފެއްދުމަށްވާތީ އެވެ.
"ޕްރޮޖެކްޓް 37" ގެ ލީޑް އެކްޓަރަކީ ވެސް ރަވީ އެވެ. އޭނަ އަކީ ޗިއްޕެ ޑައިރެކްޓްކޮށް ބެލުންތެރިންނަށް މާޗް މަހު ގެނެސްދިން ރިވެންޖް އެކްޝަން ތުރިލާ "ފުރޭތަ" ގެ ވިލަން އެވެ. "ޕްރޮޖެކްޓް 37" އަކީ ވެސް "ފުރޭތަ" ގެ ސްކްރީން ރައިޓަރު އަހުމަދު ތޮލާލްގެ ސްކްރީންޕްލޭއަކަށް ހަދާ ފިލްމެކެވެ.
މީގެ ކާސްޓްގައި މައިހާ، ޝީލާ ނަޖީބު، މޫސާ އަލީފް، އަހުމަދު ޝާކިރު ޝާއްކޮ އައްމަޑޭ)، އަދި ރަޒާން ހިމެނެ އެވެ.
ޕްރޮޑިއުސަރު މުހައްމަދު އަލީ (މޮގާ) ބުނީ "ޕްރޮޖެކްޓް 37" ގެ ޝޫޓިން އަށް ދެ މަސް ދުވަސް ނަގާނެ ކަމަށާއި މުޅި ފިލްމު ވެސް ޝޫޓްކުރާނީ މާލޭގައި ކަމަށެވެ.
ޑާކް ރެއިނުން މިހާރު އަންނަނީ އޮކްޓޯބަރު 7 ގައި އެ ސްޓޫޑިއޯގެ ފުރަތަމަ ހޮރޯ-ކޮމެޑީ "ބިބީ" ގެނެސްދޭން ތައްޔާރުވަމުންނެވެ. އެ ފިލްމުގެ ރަސްމީ ޕޯސްޓަރު ވެސް މިއަދު ވަނީ ދައްކާލައިފަ އެވެ.