އިޒްރޭލުން ފަލަސްތީނުގެ ގާޒާގައި ހިންގަމުންދާ ގަތުލްއާންމުގައި އިއްޔެ އެކަނި 35 މީހުން ޝަހީދުކޮށްލައިފި އެވެ.
ފަލަސްތީނުގެ އިންފޮމޭޝަން ސެންޓަރުން ހާމަކޮށްފައިވާ ގޮތުގައި އޭގެތެރެއިން 13 މީހުން ޝަހީދުކޮށްލީ އިޒްރޭލު ސިފައިން ބަޑިން ދިން ހަމަލާތަކެއްގަ އެވެ. އަދި ރެފިއުޖީ ކޭމްޕަކަށް ދިން ވައިގެ ހަމަލާއެއްގައި 9 މީހަކު ޝަހީދުވިއިރު، ކާރަކަށް ދިން ބޮމުގެ ހަމަލާއެއްގައި ހަތަރު މީހަކު ޝަހީދުވެފައިވާ ކަމަށް އެ އިދާރާ އިން ހާމަކޮށްފައިވެ އެވެ.
އިޒްރޭލުން ގާޒާގައި ބޮޑު ގަތުލްއާންމެއް ހިންގަމުންދާއިރު، ގާޒާގެ ސިއްހީ ނިޒާމު އެއްކޮށްގެން މިހާރު ވަނީ ހުއްޓުމަކަށް އައިސްފަ އެވެ. އެގޮތުން 25 ހޮސްޕިޓަލެއްގެ ހިދުމަތް އެއްކޮށް ހުއްޓިފައިވާއިރު، ހިދުމަތް ދެމުންދާ ހޮސްޕިޓަލްތަކުން ސިއްހީ ސާމާނު އެއްކޮށްހެން ވަނީ ހުސްވެފަ އެވެ. އަދި ހޮސްޕިޓަލްތަކަށް ސިއްހީ ސާމާނު ގެނެވޭނެ ގޮތެއް ވެސް މިވަގުތު ނެތެވެ.
އިޒްރޭލުން ފަލަސްތީނަށް ހަމަލާދޭން ފެށީ މިދިޔަ އޮކްޓޫބަރު މަހުގެ 7 ވަނަ ދުވަހު ކަމަށްވާއިރު، އެ ހަމަލާތަކުގައި 40،000 އަށް ވުރެ ގިނަ މީހުން ވަނީ ޝަހީދުވެފަ އެވެ. ހަމަލާތަކުގެ ސަބަބުން ގާޒާގެ 85 ޕަސެންޓު މީހުން ގެދޮރު ދޫކޮށް ވަނީ ގޮސްފަ އެވެ. އަދި ގާޒާގެ ބައި މިލިއަނެއްހާ މީހުން ބަޑުހައިހޫނުކަން އަންނަނީ ތަހައްމަލު ކުރަމުންނެވެ.